Ka United Democratic Party (UDP) da pynche ko wa u General Secretary yong ka katkam ka riti krehkaam ka Party da pynkupbor ya oo wow soi u ya waroh ki kot ki sla yong ka Party.
Ya ini da ong yow jubab yeiwa ong ka chnat khynroo ka NPP ka NPYF wa u General Secretary ka UDP da chim kabu wei da leh u dei bor samen yong oo wow thoh cha u Montri Rangbah ka jylla yow dawa pyndooh noh ya u Montri ka chnat bordiñ ya ka chuki u kamjooh ya u CMD ka MeECL.
Ka Party da ong ko wa yieñ skem ko ya ini i dawa iwa daw rah hakhmat u Montri Rangbah manda yoh por u wow yaklam hajrong kani ka phang.
Chooh chooh ka UDP da pynche ko wa neidaw wa duna i por wei joor thut i krehkaam ki Mobile Network neidaw wa em i dooh bordiñ, ym em yohlaad ki wow kynjoh ktien cha u MLA ka Party uwa man leh kam u Montri sorkar.
Da ong leh wa i rai wa da chim toh neibynta i bha i miat ki paidbah ka jylla wei ym em kwah ki wow klam won ya ki kaam pohyung hakhmat ki paidbah wei lada mih iwon iwon, daw pynbait wei daw e hei stat u Montri Rangbah kammon wow lai chakhmat.
Da pynche ki leh wa kam kiwa emlang hapoh ka sorkar wa em yei kitkhlieh da chim ki ya i rai yow pynsñiaw cha ki bor wa toh u pait ya ini neibhah i kaam wa yatoh wa i bordiñ toh iwa emkaam bha haka synchaar khadar, kamjooh ha ka khayi pateiñ, ki yaw ki haat waroh kawi.
Da ong leh wa sñiawsih ki wa em kiwa ym chynna yei hiar ka MeECL iwa lada ym leh iyi iyi daw poi chaddooh i haap i oor noh ka MeECL. Wei lada jia ini, daw e laad ko ya kiwa chim kabu wow e noh yaka MeECL cha ki bru samen iwa daw wanrah kylla yaki paidbah wow chah leh ki katwa ngait ha i kti ki bru samen.
Da pynkut deiwa ong wa ka Party daw yachem ko ha kini ki sngi yow yaklam hajrong kani ka phang wa chon bha.
