“Ka Dorbar Mang Tangka ka JHADC yong uni u snem 2021-22 da man ko kawa pyndooh mynsien ya nga kam uwa mihkhmat paidbah cha kani ka Council,” da ong u MDC ka BJP, u Lakhon Biam ynne ka sngi hawa e yei klam hajrong ka Mang Tangka kawa da wanrah u CEM ka Council, u Thombor Shiwat ynnin ka sngi.
U Lakhon da kdaw u ya ki bynta wa duna ha kani ka Mang Tangka deiwa ong wa ka Council da haap ko neibhah wa da boon i pynlut bar yeiwa yoh.
Da ong u wa ka tulop kawa sah wow su cha ki wakreh ka Council hadooh ki MDC wa kiwa da chongngiah da man ko T. 7 klur chi bnai iwa man ha ki 10 bnai wa sah da kynjoh ko cha ka T. 70 klur kawa toh u su du ya ka tulop.
Chooh chooh u Lakhon da ong u wa da yoo wyrai wei da sñiawsih u wow yoo wow sñiaw wa ki Bank katni ym nood de ki wow e ram ya ki wakreh ka Council neibhah wa ym tikna i rukom yoh tulop ki wakreh.
Da ong u leh wa ka EC da lai ko cha ki karkhana pynmih khyndaw-bilat heiwa da rai wow booh ya ki Monitoring Gate ha ki thaw psiah cha kini ki karkhana tangwa du hadien ar le sngi ka sorkar jylla da phah pyndam ko ya kini ki Gate.
“Neiyi i daw wa ka EC pdiang wot ko ya iwa phah ka sorkar wow pyndam ya kini ki Gate?” da kylli u Lakhon hawa ha ki NOC wa e cha ki karkhana da klam che wa ka Council ye ko wow booh ya kini ki Gate, deiwa ong leh wa ka soskular ka JHADC wa ki karkhana pynmih khyndaw-bilat da man nod ko.
Da ong u leh wa bar ya ki Gate Dolloi emkaam wow booh ya ki Gate ha ki karkhana neibhah deiwa leh kamtæ daw yarap bha i ya ka yarong poisa ka Council.
U Lakhon da ban joor u leh wa ka EC ymtoh u ap næ tieñ ko ya ka sorkar jylla hawa man Autonomous Council ko, emkaam wow yieñ dap chynrang ki MDC neibynta ka mynried yong ka Council.
