I sangeh ka Jowai Municipal Board (JMB) wow wan kit yei jhep na chnong Jowai la chitayaw da wanrah ko yei chem chitom ya ki paidbah nadooh kiwa chong dukan wa kiwa chong chnong.
Neiliang u Wyrta da booddien u wow yaklam wa ki bor District nadooh u DC u Garod LNS Dykes wa u ADC uwa man leh u CEO ka JMB, kamjooh leh u Chairman ka Board u Fidel War wa ki sahep ka JMB heiyatoh wa ini i kaam wei kammon da leh khnang wow pynsuk ki paidbah.
Wot ya ini i kaam da chimkhia leh wow booddien da ka Synjuk ki Waheh Chnong Jowai ha ki sngi wa dadep wei kamjooh leh u MDC ka JHDAC na Jowai Central, u Andrew Shullai wa ki waheh chnong kiwa haap hapoh kani ka Constituency.
Ynne i janmiet hawa yaklam wa u DC ka District, u Garod LNS Dykes da pyntip u wa da khut ya ka yalang wa ki 7 chnong kamjooh ka KSU kiwa da pyrchah yei noh-jhep ka JMB ha Mynkjai ha ka 31 tarik uni u bnai wow yaklam ya ki wow chah ya wow pynemkaam ya kani ka thaw (Mynkjai) sa chibet chipor.
Da pyntip u leh wa da phah ya ka JMB wow wan thooh jhep na ki yung nadooh ka 29 wa 30 tarik uni u bnai wow kit u lai noh ya i jhep cha kiwi ki District neibhah da jooh leh kamni ha ki por wa dadep manda em i wit i thut.
Heijooh i por da pyntip u leh wa manda sdang ka JMB u wan thooh jhep ha ki sngi wow wan boi ymye ko u pyndep du ha ki chi sngi ar sngi neibhah wa jngai i thaw wow lai noh ya ki, kamtæ da kyntu u ya ki paidbah wow man ki kiwa yaichah.
