Kiwa chong chnong ka Shangpung Mynkrem da dap ki dei sñiawngooh ya ka EC ka JHADC hapoh i yahkhmat u CEM, u Thombor Shiwat wada chimkhia ki wow pyndooh ya ka NOC karkhana Coke kawa da thmu u chna hapoh u pood u ang ka chnong Shangpung Mynkrem.
Kamjooh leh da ekhublei kyrpang ki ya ki seiñbhalang wada em sakhiat ki ka mynsien krehmon sñiawbha neibynta i miat i bha ka imlang sahlang ka jaitbru kamjooh wow yada ya i khyndaw i chyiap na i wan ki baar ri chisngi kiwa wan kamai spah hapoh ka Ri-loom Jaiñtia.
Ki seiñbhalang wada kyrchaan na mynsien nadooh ka JSU, KSU, JSM wa ka MPUF, da wan ki chakhmat wow pynsñiawthooh ya ki paidbah kiwa chong chnong yei maa lada yoh u chna ya kani ka karkhana khamtam leh yei ktah joor ko ya ki para jan chnong wei ktah ko ya i rep i riang ktah ko ya ki um ki wah. Da yieñ tylli wow pyrchah ya i rai wow e ya ka NOC cha kani ka karkhana kawa leh samen da u waheh chnong ka Shangpung Mynkrem.
Kiwa chong chnong da ong ki wa kamwa da ong u CEM ka JHADC haka dorbar mang tyngka wa ka EC yong oo ym e NOC ko ya kani ka karkhana Coke kawa da thmu u chna ha chnong Shangpung Mynkrem, wei hajrong ini neiliang ka chnong ngaitskem ko wa ka EC yong u Thombor Shiwat ym chet kylla de ko ya kiwa chong chnong hadien habood.
