Uwi na kiwa chah dat lang wa u Phershanroy Myrthong (uwa da khlaad noh) ha ki damok wym tipmit ha Golflink, da pyntip u wa da em kamwa 20-30 ngut ki bru kiwa da wan wow thombor ya ki ha ka janmiet yong ka 21 tarik uni u bnai, wei ini da jia hadien wa em ki sa du 4 ngut, katwa dang chongke ki hadien wa da dep yaleh bol.
Uni uwa chah dat lang uwa ym em kwah wow pynmih pyrtuid, da khana u wa ki bru wa dat ki da klam ki da i ktien dkhar wa Garo, wei i chah dat toh iwa khlem em iyi iyi i daw. Uni uwa chah dat lang toh uwa dang em yatoh wa u Phershanroy Myrthong, da pyntip u wa hadien itai i jia ym em yong bru de u hadooh wa poi ha i thaw sumaar. Katkam wa pyntip u, ym em ki pulit wa wan takit næ kylli na oo hajrong itai i jia.
Ha kawi won ka khubor, ka KSU South West Khasi Hills District deilang wa kiwi ki seiñbhalang wa ki paidbah yongka South West Khasi Hills District, deiwa sñiawkhia hajrong i khlaad noh u Phershanroi Myrthong uwa naka chnong Wahkaji iwa da jia neidaw i chah dat ha ki wym tipmit haka 21-03-2021 ha Golflink (Shillong), da chim yaka rai wow pynman yaka Rally haka 31 tarik uni u bnai ha yaw Mawkyrwat ka wow sdang na Lad Mawkyrwat C&RD Block ha i por 11 waje i step kam chibynta wow beiñ hajrong i jia wei wow dawa leh yei hok hajrong i chah pynkut yabor yei mynsien ha ki damok.
