Kiwa ha yung ha sem u Hammut I Sungoh da pyntip ki wa da chem biang ki ya oo wei da pynsñiaw ki yei sñiawngooh ya ki lok ki jor, ki kur ki jait, ki laad pathai khubor, ki pulit, ki waheh chnong, kiwa chong chnong waphær waphær wa kiwi kiwi de kawa da yarap ya ki ha kini ki por.
Da pynsñiaw ki leh yei sñiawkmen wow yoh u yachem biang sa chisien wa u khon yong ki uwa da wiar nadooh ka 16 tarik uni bnai deiwa e khublei kyrpang ya u Daohipathan Suchiang kam u para chnong uwa da chem ya u Hammut na Mawprem, Shillong wei da li yah biang u ya oo cha yung, u Blai u kyrkhu kyrdoh u ya oo kamjooh ya phi waroh.
Kam wow pynkynmoo wa haka 16 tarik uni u bnai, u Hammut uwa na chnong Mynska uwa sah ha Phramer da ku kari u na Laad Pasyih yow lai cha Jowai wow yachem ya u ma u tangwa ym em poi u cha i thaw wa da pynbait u yachem.
U Hammut man u leh uwa rap duna heibor pyrkhat pyrdaiñ.
