Hadien wa sah ki jhep ha ki yung ha Jowai nadooh wa sangeh ka Jowai Municipal Board (JMB) wow lithooh ya ki, ynne ka sngi kiwa yahkhmat ka Co-ordination Committee kawa kynthup ya ka CNI Market Committee, ka Seiñraij Jowai wa ka Dorbar Chnong Tympang Iawmusiang da lai yachem ki ya u DC ka District, u Garod L.N.S Dykes, wow yaklam hajrong ini i eh i khoo wa yachem ki paidbah khamtam heiyatoh wa ka JMB.
Ha i yachem neiliang u DC da pyntip u wa neiliang ki bor District wa ka JMB dadep chong yalang ki wei da jied ki ya iwi i thaw wow lai noh ya i jhep chipor wei nadooh mynstep ka 31 tarik u sdang lithooh biang ka JMB na kylleiñ ka Jowai.
Ha kani ka sngi u Waheh Chnong ka Tympang Iawmusiang, u E. Shylla da pyntip u wa da sdang leh ya ka Co-ordination Committee ka wow pait ya i bha i miat wa i khooid i jngiar khamtam ya ka Iawmusiang wei kani ka Committee u kynthup ko ya ka Dorbar Chnong Tympang Iawmusiang, ka Seiñ Raij Jowai wa ka CNI.
Hapoh kani ka Committee u E. Shylla u man u kam u Chairman, u A. Gatphoh u man u kam u Secretary katwa u OR Challam won kam u Adviser.
Uwi na ki dkhot ka Committee da ong u wa iwi na iwa pynartatien ya ki kam ki dkhot toh wa i thaw nohjhep ka JMB iwa daw sdang noh-jhep noh toh iwa chipor donhi.
Kamtæ da kyntu joor ki leh ya ka sorkar wow chimkhia yeini khnang wa neini chaphrang ym jia de i kamni wow wanrah biang yei chitom ya ki paidbah.
Neiliang u OR Challam da ong u wa da kyrmen u wa chwa wow lai yachem ya u DC, neiliang ki bor District da chong yalang ki neibynta ini i kaam deiwa ekhublei leh ya ki paidbah wa da em ki i mynsien yaichah ha kini ki sngi wa dadep.
