Ynnin ka sngi hadien wa chem ya iwi i metyap kawi ka kynthai na Chahtngit, Jowai neiliang ki pulit da sdang pynman ki ya i takit wei da yoh kem ki ya uwi u bru wa suba wa emkti ha i yap kani ka kynthai.
Neiliang ka bei yong kani ka kynthai leh da ujor ko ha ki pulit hajrong ini i jia.
Kani ka kynthai toh kawa 23 snem i rta kawa chnong wa sah ha Jowai chirup wa u kurim wa ki khon yong ka. Ki pulit da yoh yutip ki na ki paidbah wa da chem ya i metyap yong ka ynnin i step heipor kamwa 9:30.
Hadien i takit, ki pulit da chem ki wa da em kawi ka kari Maruti Swift rong lieh kawa oor pyn hajan ini i thaw wa chem yei metyap ya kawa da dep taan wei sai noh na ini i thaw chwa wow tip wei poi ki pulit ha ini i thaw wa em i metyap.
Hawa yaklam wa u SP ka West Jaintia Hills, u Bikram D Marak da ong u wa da kem (Seized) noh ya ka kari pyn ynnin na ka karkhana wa phah chna yaka wei da yoh leh u kem ya uwi u bru wa suba emkti ha ini i yap kani ka kynthai wei ya i pyrtuid yong oo ympu ye u khana katwa i takit dang lai i chaphrang.
Da pyntip u leh wa ynnin ki pulit na ka Crime Scene Unit (CSU) da wan sylli ki ya i thaw wa chem ya i metyap wei myntu won daw wan sylli won ki ya kani ka kari.
Hajrong i daw wa yap kani ka kynthai wa i chem yong ki pulit na ka takit, neiliang u Marak da ong u wa ya katni ympu ye u ong iwon iwon namo katwon ngut ki bru wa emkti, wei kammon yatoh kani ka kari wa i metyap wa da chem wei dang yang ya ki CSU wa ya ki pulit wow pyndep ki ya ka takit.
