U CMD ka MeECL da pyntip u wa ha kini ki 6 bnai da wanrah chiboon i pynkylla hei rukom krehkaam ka chnat wei ini da wanrah ko yeiwa ye wow pynku yei pynmihpoisa da 6.05% neibynta u snem mang poisa 2020-21 hawa nujor wa u snem wa da dep.
Da pyntip u leh wa du ha u Wisu (Mar), 2021 i yoh bai bordiñ da poi ko T. 102.88 klur iwa heh dooh wei iwa ym jooh poi hadooh katni nadooh wa sdang.
Da pyntip u leh wa i pynkylla hei rukom krehkaam ka chnat toh iwa krehkaam bha heiwa da e khublei u ya waroh ki wakreh kiwa da ye wow pynpoi cha kani ka thong.
Kam wow pynkynmoo wa ka MeECL da pynkrehkaam ko ini wa dep yaka One Time Settlement Scheme kawa e laad yaki bru wym em su bordiñ wow su ki yaka bai bordiñ wa sah deiwa maap 30% ka bai bordiñ lane deiwa maap yaka kuna wa toh nei slem wa su bai bordiñ.
Du ki karkhana wa da su yaki bai bordiñ hapoh kani ka Scheme da poi ko palat T. 14.46 klur wei deilang wa i su kiwi da poi palat T.19 klur wei kawa dang sah da man ko kamwa T. 500 klur.
Ynnin da pynbna leh wa kitu ki wym su bai bordiñ daw chah ah noh ki nadooh ka 16 tarik uni u bnai.
