U CMD ka MeECL da pyntip u wa nadooh wa sdang yaka One Time Settlement (OTS) Scheme da ka MePDCL ha ka 04-11-20, da man sakhiat ko kawa jop wei da em chiboon kiwa da tip chaphang yong ka kiwa da wan chakhmat wow chim kabu.
Kani ka OTS toh neibynta ki bru paidbah, ki chnat sorkar kamjooh ki karkhana ki wym em su yaka bai bordiñ yong ki heiwa ye ki wow jied deiwa maap ya waroh ka kuna wa ngat ki neidaw wa slem u su lane deiwa maap 30% na waroh kawi ka bai bordiñ yong ki kawa sah khlem su.
Kamtæ da ong wa 4 bnai da man ko iwa tbian i por yow ye u pynbiang ya waroh iwa emkaam ki paidbah heiwa nyngkong da pynyinsur ya kani ka OTS hadooh ka 31-03-21. Hanla kattæ leh dang em ki wym em wan chakhmat wow su.
Kamtæ da chim yaka rai wow e laad sa chisien wa iwa khaddooh ya waroh kitu ki wym pu em su ya i bai bordiñ hadooh kani ka 15 tarik, wow su ki wei lada ym su daw chah ah bordiñ nadooh ka 16 tarik uni u bnai kamwa da dep pynbna.
Da pyntip leh wa ka bai bordiñ wym pu em su kawa dang sah da poi ko palat T. 500 klur wa kynthup yaka bai bordiñ yong kitu kiwa da dep chah ah bordiñ kiwa em wa sah khlem su da ki phaw snem.
Kiwa wa pynemkaam bordiñ (Customer) kiwa ym em su da em ki 273726 ngut hapoh ka jylla.
