Ka seiñ ki manbei na Ri-loom Jaiñtia ka Hynniewtrep Women Welfare & Development Organization da dap ko dei sñiawkhia wa joor ya i chah thombor wei chah tynyap ki kynthai wa ki manbei ha Ri-loom Jaiñtia kawa da poi hadooh san ngut du ha kini ki kajiak bnai wa da dep.
Kini kiwa chah tynyap toh kawi ka manbei ka Nimai Phawa naka chnong Mihmyntdu kawa chah tynyap ha u Naiynñiaw, 2020, ka khynnah skur ka Mantip Langstang ha u Kmaichonglad (Dec), 2020, ka Ebamon Siangshai naka chnong Pamrakmai ha u Wisu (Feb), 2021, i chem ya iwi i khonboo kynthai wa dang dep kha ha Ladthadlaboh, Jowai wa ya sa iwi iwa da jia ha uni u bnai heiwa da chem ya i metyap yong kawi ka manbei na Chahtngit.
Ka seiñ da beiñ ko khamtam ya ini wa dang jia ha Chahtngit iwa da jia haka 3 tarik uni u bnai heiwa yei metyap yong kawi ka bru da chem deiwa chah noh harood ka wah heiwa ka seiñ da phah ko leh yaka khubor sñiawlem cha kiwa ha yung yong ka.
Ka seiñ da kyntu wei dawa ko yaki bor yong ka aiñ wa toh u kreh chitom ki hadooh wa yoh kem ya ki damok wei wow pynchitom ya kiwa emkti ha ini i kaam. “Ham e wa i spah wa ka poisa u su dor ko yaka aiñ wa ya i tput yong kiwa maad yeini i chah leh dusmon”.
Ka seiñ da kyntu ko leh yaki khon kynthai ka Bri U Ynñiawtrep wow man ki kiwa tip ya i burom i akor, ka riam ka bait, ka kup ka sem, ka ktien ka thylliej. Wow kiar nei lai i wan wa ki chynrang næ ki bru ki wym tipmit bha lane ki wym ye u chaniah khamtam hei miet, wow kiar nei baam i dih, wow kiar nei yalang khynroo, u paan poisa, u biej poisa yow lait ki bru wa sih wymman u yohlaad yoh kabu pathan wow leh ya kam kini ki kaam wymman.
Puræ leh: Da pynkha wei pynskem yaka Hynniewtrep Women Welfare & Development Organization
