Ki sngi katni toh ka juk yong ka Internet heiwa da emkaam ya ka aw jan 24 kynta lada ha i khih i kreh, i puræ puthi, i kaam yong lok, yong yung wa kiwi kiwi.
Kamwa boon hi ki bynta wa da dawa wa emkaam ya ka Internet kamtæ hi ki karkhana wa e Internet leh mih ki wei boon ki, nadooh kiwa e ya ki Mobile Internet hadooh kiwa e ya ki Broadband Internet.
Ha kini ki sngi wa dadep ki paidbah da ood bha ki khamtam hadien wa slah thut ka Internet ka NEline wa ka Network ka Vodafone kawa da ktah joor bha ya kiwa pynemkaam ya ka Internet wa Mobile Network yong kini ki Company.
Uwi na ki khynroo wa pynemkaam ya ka broadband ka NEline da ong u wa ka Internet yong ka da thut ko dei langær wei iwa phylla roh wa ini jia i manda dooh Network ka Vodafone.
Da ong u leh wa ini i slah dooh Internet da ktah joor bha i ya ki paidbah khamtam ki khynnah ha i puræ puthi yong ki neibhah wa katni dang em boon ki bynta wa emkaam Internet ki.
Heiyatoh wa i slah dooh network ka Vodafone, ki paidbah da ood ki neibhah wa ini i dooh Network da ktah i ya ki ha ki por wa emkaam khamtam manda em ki kaam wa rap jhan.
U D. Lamare uwa na Jowai da kylli u wa hawa kamni ka dooh Network ka Vodafone pynuiñ hi ko namo pyntam hi ko ma-ai ya ka poisa wa da Recharge neibhah wa i dooh Network da neh i palat 24 kynta kattu.