Ynnin i miet heipor kamwa 11:30 i da yoh kem ya kawi ka Bus wa em ya u Number ML-10C-0206 kawa kit kamwa 40 ngut ki baar jylla ki wym em yaki kot ki sla wa biang naka chnat Labour kiwa thmu wow lai kreh cha ka Coke Factory kawa em ha Mynska Shangpung, West Jaiñtia Hills District.
Ya ini da leh da ki dkhot ka MPUF, HNPF deilang wa ki dkhot ka JSU-Laskeiñ Block Circle wa ka KSU Shangpung Unit kiwa da ong wa ini i wan psiah ki baar jylla man ko kawa ym chong nia khamtam ha kam kini ki por wa em ka khlam COVID-19 heiwa ym em leh ki yaka Test kawa da phah daka sorkar wa pait yei chait i khiah.
Neiliang ki seiñbhalang da leh ki ya iwa emkaam wei da pynuiñ biang ya kini ki bru deiwa kylli leh kammon wa kini da yoh ki wow psiah khlem leh yaka Test COVID-19 kamjooh le kiwa ym em biang yaki kot ki sla.
U Phrang Suiam uwa man leh u President ka MPUF wa u Newborn Suchiang uwa man u President ka HNPF da pyntip ki wa da yaklam ki wa u tre ka karkhana uwa da ong wa da dep chim yaka Form naka chnat Labour tangwa ym pu em dep wow Register ya ki wakreh, kamtæ neiliang ki seiñ da ekti noh ki cha ki pulit neidaw wa toh da miet.
Ynne i step neiliang ki 2 seiñ da yaklam ki wa u In-charge ka Raliang Out Post uwa da pyntip wa da dep wow pyntikna wa kini ki bru toh ki nong India kamtæ da rai wow pha liwan ki neidaw wym chah ka aiñ wow ksoh slem ki.
