Ka Dorbar Chnong Sohpoh kawa haap hapoh ka West Jaiñtia Hills District, Meghalaya da e khublei kyrpang ko ya waroh 4 tylli ki skur kiwa em hapoh ka chnong, wa kynthup ya ka RCLP School Sohphoh, Saw Balang Presbyterian UP School Sohphoh, Sohphoh Govt LP School wa ka Bamjatap SSA LP School Sohphoh kiwa da chimkhia wow pynkhooid ya ki sarok wa ki luti syngkieñ ha waroh kawi ka chnong.
Ini i pynkhooid ki khynnah skur man i iwa nyngkong, heiwa ki skur hapoh ka chnong da chimkhia ki pyn daki hi wow pynkhooid ya ka chnong waroh kawi ya kawa da sdang ynne ka 9 tarik wei da booh thong ki wow pynkhooid chisien chi snem man-u-bnai næ katwa dawa i kaam.
Kam ka chnong kawa thrang wow wanrah yei khooid i jngiar khamtam wow pyndooh ya i noh habra ya ki Plastic da pyrchang ko wow bood da ki tin noh-jhep chi lynter ka sarok, wei ka chnong da dap ko dei mynsien wa kmen hawa kiwa sikai wa ki khynnah skur hapoh ka chnong ksohkti ki wow pynkhooid ya ka chnong waroh kawi, khamtam deiwa kular wow bahkhlieh wow wanrah yei khooid i jngiar, da ong u Foster Kharsahnoh uwa man u Secretary ka chnong Sohphoh.
Neiliang ka yung krehkaam ka Dorbar Chnong Sohphoh, da ekhublei kyrpang ko ya kiwa sikai kiwa ym em kyntait ya i yumut wa pachat ka chnong khamtam heiyatoh wa i thmu wow wanrah ya i khooid i jngiar deiwa kitbok leh ya waroh ki khynnah wow man ki kiwa ku chaphrang ha i stat i tip, i burom i akor wei wow man ki kiwa Tip Bru Tip Blai.
Ka chnong da maham ko leh ya waroh kiwa wan wa kiwa lai luti na ka chnong wa ymhoi de u nohroi ki ya ki jhep ki jakhlia khamtam ya ki Plastic tang wow noh bait ha ki tin noh-jhep ha tymbud ki sarok ki luti.
Chooh chooh da kyrpaad leh ya waroh wow krehlang khnang wa ka thong ka chnong u man ko kawa jop, da pynrap u Mutshwa Thabah u Waheh Chnong Sohphoh.
