Ynnin ka sngi, u In-charge ka Ladrymbai Police Outpost u SI W. Nongtdu da khut u wow pynman yaka yachemlang wa waroh ki Waheh Chnong wa haap hapoh u pood u ang yong ka Ladrymbai Police Outpost.
Kani ka yalang man ko kam chibynta wow wanrah ya i yajan wei ya krehlang hapyrdi ki bor shynchaar chnong wa kiwa chakri sorkar lyngba ka chnat pulit khnang wow wanrah ka chongsuk chongsaiñ ha ka imlang sahlang.
Kani ka yalang da pynman ha pchem ka yung krehkaam ka Ladrymbai Outpost, kawa pynlai da u In-charge katai ka Outpost u SI W. Nongtdu deiwa emlang u In-charge ka Traffic U SI ASR Lakiang.
Ha ka yalang da yoh wow yaklam chiboon ki phang wa kynthup nadooh i sahkut kari ha Ladrymbai wa ki paidbah wa lai wa wan, kiwa kamai kari ki wym ya krehlang næ bood ya ki kyndon pynlai kari.
Kamtæ ka Traffic Cell da pyntip ko wa chitom ko wow kdoh u khoom neidaw wa duna bru wakreh heiwa kamwa man katni da em uwi u Major wa arngut kiwa yarap yong oo. Hajrong kani ka phang, ka yalang da rai wow kem bait naphang ya kitu ki kari wa pynyieñ kari pyrchah ya ka aiñ ha rood sarok wei wow pynchitom ya ki katkam ka aiñ. Da rai leh wa ki VDP Chnong ka Ladrymbai Pyllun u yarap, u ya krehlang wa ki pulit Traffic khnang wow ye u pyndooh yei sahkut kari.
Chooh chooh ha kani ka yalang da yaklam chiboon ki phang wa kynthup nadooh ki kaam wa yatoh waka aiñ, ki kaam wa mih neidaw u pood u ang, i chongkha dang khian rta, i yada na ki kaam pyrchah aiñ, ki kaam wa yatoh wa ki drugs, i pynsakhiat ya kiwa chong wai, ka khlam COVID-19 wa kiwi kiwi de.
Hajrong ini, kiwa synchaar chnong kiwa ya emlang ha katai ka yalang, da pynsñiaw ki yei sñiawngooh wei yaroh ya u In-charge ka Ladrymbai Police Outpost wa da wanrah kam kani ka yalang wei da pynsñiaw leh wow pteiñ yei ya krehlang wa kiwon kiwon ki kaam wa mih ha i por wa emkaam.