Ka Raij Mukhla ynnne ka 11 tarik kawa man ka sngi Pynsiñ da pyndep ko ya ka lehniam Knia Ryngkaw uwa man u Blai wa khlieh dooh na waroh ki Blai wa em hapoh ka Raij uwa ri wa sumaar ya ki khon ka Raij waroh chi lynter u snem, u wow yada nei kjut i chitom, wow bha leh ka kamai wa i puræ puthi ha waroh ki liang hanlada chong sah ki cha palat u Ryngkaw u Samun cha palat chnong palat thaw tangwa u Blai Ryngkaw Wasa emlang u wa ki khon ka Raij.
Ya kani ka lehniam da leh man-u-snem ha kini ki bnai Wisu/Naitung wei kat wympu dep ya ka lehniam ki khon ka Raij ympu ye ki wow hiar rep.
Kani ka Knia ya u Syiem Ryngkaw man ko ka lehniam wa soo hapoh ka Raij Mukhla nadooh i por tlang, ka Raij Mukhla da pyndep ko ya ki lehniam kam ka Knia ya u Syiem Pyrthat, ka Syiem Kupli wa u Yale, wa ka Knia ya ka Syiem Klam wa u Ram Shyllong wei ynne won da pyndep ya ka Knia Ryngkaw kawa man kawi na ki lehniam wa heh tam hapoh ka Raij wei kat wympu dep ya kani ka lehniam ym ye wow pynman ya ka Behdieñkhlam.
Ha kani ka Knia Ryngkaw ki khon ka Raij da wanrah ki da u syiar wa ka blang, iwa chong katkam i mane næ ka thong yong ki ya u Syiem Ryngkaw heiwa u Langdoh u pyndep u heipor wa Knia wei uni u snem em hadooh 31 tylli ki syiar ryngkooh wa u 8 tylli ki blang kiwa u Langdoh da pyndep u ya ka Knia hapoh ka Duwan ka khloo kyntang ka Raij Mukhla.
Kamtæ ya kani ka Knia Ryngkaw da sdang ya ka nadooh i step ynne ka sngi na Yung Langdoh Yung Blai wei hadien ini da lai Knia won cha Duwan ha ka Khloo Blai, ya kani ka lehniam Knia da yahkhmat da u Langdoh wa ka Langdoh chirup wa ki Waheh Sankur Sankmai ki Saikhrong Saithri kiwa haap hapoh ka Raij Mukhla.
Kani toh katkam ka Wyrta na u Standbyme Sari uwa man leh u Waheh Sankur na ka Kur Sari uwa lai mihkhmat ya ka kur Sari hapoh i pynlai u Langdoh.
