I pyndik pynthut ki chipai ka GTC ha Mawshbuit da sdang biang i ynne i janmiet heiwa ki chipai da khang ki ya ka Gate wow lai cha ka chnong Mawshbuit, wei ini i leh embor ki chipai da pynchrai i ya ki paidbah ka chnong heiwa da poi chei ya pynyoo bor hapyrdi ki chipai wa ki paidbah wei ha ini i jia da em leh ki paidbah wa da mynsoo hadien wa chah dat chah bom ki.
Katkam wa ong kiwa chong chnong kani ka thaaiñ, i kulmar da mih i hadien wa ki chipai da booh ki ya ki top psiang (Barrel) ha kini ki thaw iwa da wanrah ya thut i lai i wan ki kari paidbah, tangwa kiwa chong chnong da lai yaklam ki wow pyrchah yeini wei neiliang ki chipai da pynkhor i wei ini da wanrah i yei kulmar.
Hadien wa tip yeiwa jia, neiliang ki bor District da lai ki wut-wut wow leh yeiwa emkaam wow tip yei tre i daw wa mih ini i awri.
