Ka Khasi Students’ Union-Shillong Mihngi Circle hapoh i yahkhmat u President u Sonstar Nongkhlaw, ynnin ka 14 tarik da yoh ki wow kem ya ki bru wym em ya kiwon kiwon ki kot ki sla kiwa pyntipmit wa neiwon poi ki cha ka chnong Umsawli hajan IIM.
Ka seiñ hadien wa yoh yutip ko wa em ki bru wa poi wiar, wut wut da lai ki yow pynman yei thooh bniah heiwa kini ki bru da kam ki wa ki toh kiwa kreh mylla kiwa wan na Siliguri, tangwa hawa ki dkhot ka KSU da paan ki ya ki kot ki sla kam ka Work Permit katkam ki kyndon yong ka aiñ, ym em uwi leh wa ye u pynsakhiat ya i thmu yong ki.
Ini da pynkhyrngiat ko wa kammon ki bru kiwa na kiwi ki thaw u ye ki u psiah laitlan khlem da em iwon i pynsakhiat na ki bor wa haneiñ khamtam kam ha kini ki sngi wa u COVID-19 da sdang biang u wow pynkulmar ya kiwa chong chnong ka jylla hi waroh kawi.
Ka seiñ da kylli ko wa kiyi wow kitkhlieh hajrong kitai ki bru, boi ye u man wa kini ki bru em ki da kiwi won ki thmu wow rieh khamtam da wan yah lang ki wa ki khon ki kti.
Ya kini ki bru da wan wow tuklar da ki pulit ka Mawdiangdiang Outpost wei da rah noh ya ki yow pynman ya ka takit kawa bniah.
Ka KSU Shillong Mihngi Circle da klam che ko wa daw khynra ko naphang ha kini ki sngi wei da maham joor ya kitu ki Contractor la toh ki Khasi næ kiwon kiwon ki jaitbru kiwa kreh ha kani ka jylla ka yong ngi wa neini chakhmat ym toh wow wanrah kulmar ya kiwa mylla hapoh ka jylla.
