Ka Meghalaya Board of School Education (MBOSE) ynne ka sngi da sdang pynman ko ya ka Exam HSSLC næ Exam Class XII, hapyrdi i chah ktah ka jylla ha ka khlam COVID-19 wei kiwa boon ki khynnah pynsñiaw ki wa lai yakhun ki ya ka du dei wym yohsa.
Ya kani ka exam da pynman hadien wa phyllu yumut chwa wei ka sorkar ha ka yalang ha ka 14 tarik da rai ko wow pynman bait ya ka Exam ryngkat i bood thij ya ki kyndon wa da booh ka chnat i chait i khiah.
Neiliang ki kattu katni ngut ki khynnah kiwa yakhun ya ka Exam, da ong ki wa chem chitom ki wow yakhun ya ka Exam neibhah ym yoh ware ki ya i esikai wa paka neidaw wa leh du ki Online Class wei da pynman Exam khlem yoh i batai bniah wa ki Notes neibynta ki Subject kiwa yakhun ki.
Heijooh i por ki khynnah syir mynsien ki neibhah wa em ki khynnah kiwa ym bood ya ki kyndon wa da booh ka sorkar khamtam wow sap mask, i wym yieñ yajngai iwi na iwi, wei kini kiyi kiyi booh ki hei maa ya ki khynnah neibhah ymtip ya kiwa chah ktah ha u COVID-19.
Hawa yaklam wa kiwa pynlai skur, da khana ki wa da pynbiang ki yeiwa emkaam katkam wa phah ka chnat i chait i khiah la hei khooid i jngiar, wow pynyoo ya ki khynnah kammon wow bood ya ki kyndon i chait i khiah, wei wow elaad ya ki khynnah kiwa iñdoh, kiwa kjut khlieh wa i khai ky’oh wow chong ki jar jiar ki kamra khnang wa ym dooh ki wow thoh Exam.
Neiliang ka chnat puræ puthi ka jylla da chim ko ya ka rai wow pynman ya ki Exam SSLC/HSSLC, wei wow elaad wow yakhun biang ya ka Exam lada em ki khynnah kiwa yoh ya u COVID-19.
Katkam wa pyntip u montri ka chnat puræ puthi, u Lahkmen Rymbui em kamwa 32,499 ngut ki khynnah kiwa yakhun ya ka Exam HSSLC ha uni u snem, wei duna chi lak lada kynthup lang ki khynnah wa yakhun ya ka SSLC ka wow sdang ha ka 19 tarik uni u bnai.
