Ki ar tylli ki seiñ kynthai ka Ri-loom Jaiñtia kiwa kynthup ya ka STIEH wa ka HWW&DO ynnin ka sngi da lai yachem ki ya u DC ka West Jaiñtia Hills, u Garod LNS Dykes heiwa da ekti ya ka dorkhat cha ka sorkar heiyatoh wa i chah tynyap ki kynthai khamtam iwa jia ya ka Juhhi Bhoi heiwa ya i metyap yong ka da chem na Chahtngit, Jowai.
Neiliang ki ar seiñ da ban joor ki wow pynchitom katkam ka aiñ ya kiwa thombor wei tynyap ya ki kynthai khynnah wei ym hoi wow elaad wa i bor poisa wa i bor seiñhima u tlep ko yei kaam damok kiwa tynyap ya ki kynthai khynnah.
Ki ar seiñ da sñiawkhia wei sñiawsih ki wow yoo wa kiwa emkti hei thombor yaki kynthai lait suk ki du hadien kattu katni por wa chah kem ki iwa wanrah yei syir mynsien wei booh i leh hei maa ya kiwi tawon ki kynthai hapoh Ri-loom Jaiñtia.
Ha ini i yachem, neiliang u DC da ong u wa neiliang ka yung krehkaam wa ki pulit da pynman ki yei takit wa bniah hajrong kini ki kaam wei da kem leh ya ki bru wa emkti hei yap ka ka Juhhi Bhoi.
Da kyntu u leh wow em ki kynja pynche pynsñiawthooh ha jar jiar ki yung ki sem khnang wow man ka imlang sahlang kawa bha wa miat.
Neiliang ki ar seiñ daw booddien ki ya ini i chah tynyap ka Juhhi Bhoi hadooh wow chah pynchitom ki bru wa emkti khnang wow man ko leh kam wow maham ya kiwi tawon ki bru kiwa thmu wow thombor ya ki kynthai khynnah.
