Uwi na ki bru wa mahajon dooh ha pyrthai uwa man leh u tre ka Reliance Industries Ltd. u Mukesh Ambani, da e yarap u da ki tadong la’ær Oxygen wa da pynmih ha ki karkhana (Refinery) pynmih phñiang yong oo wow yakhun ya ka khlam COVID-19.
Ka Reliance Industries Ltd., toh kawa pynkrehkaam ya kawi na ki karkhana Refinery kawa heh dooh ha India kawa em ha Jambagar, da sdang ko wow e yarap la’ær Oxygen mynkna ya ka jylla Maharashtra ha i yakhun ya kani ka khlam.
U montri ka chnat Urban Development and Public Works ka Maharashtra, u Eknath Shinde da ong u wa ka jylla daw yoh ko hadooh 100 ton kani ka la’ær na ka Reliance.
Ka Maharashtra man ko kawi na ki jylla wa chah ktah bha ha kani ka khlam heiwa du ynnin da em palat 63,000 ngut kiwa dang yoh ya u COVID-19.
