Neiliang ka UDP da pyntip ko wa hanla ym em jop ko kawi leh ka Constituency haka Election MDC ka GHADC heiwa da pynyieñ kyrtong ko ha ki 18 tylli ki Constituency, i yoh Vote won ko da ku bha i.
Da pyntip leh wa ka UDP da lehbha ko ha ki 6-7 tylli ki Constituency wei da slem kattu ka UDP ym em MLA næ MDC ko na Ri-loom Garo neidaw ka seiñ leh ym em wakreh ko ha ki chnong ki thaw kiwa boon.
Haka yalang wa pynman ha Tura yow pyrkhat yeiwa da leh ka UDP ha kani ka Election kawa da emlang leh kiwa yahkhmat, da sñiaw wa ka UDP daw lehbha ko ha ki por wa daw wan deiwa chimkhia kiwa yahkhmat kamjooh deiwa lai hiar cha kini ki thaw na ki por cha ki por.
Da pyntip leh wa em kiwa boon kiwa yahkhmat na Ri-loom Garo na kiwa boon ki Party kiwa da wan chakhmat yow pynkhlan yaka Party ha Ri-loom Garo. Wei da pynsñiaw ki wa ka UDP daw lehbha ko ha ka Election MLA ha u 2023.
Ka UDP da ong ko leh wa ki paaid ka Ri-Loom Garo ha kani ka kynti da e ki yei kyrchaan hawa kynmoo yei por wa kiwa na Garo, Khasi, Jaintia da ya yieñlang ki yow yaleh yoh jylla hapoh ka Party Ri-loom kawa tip kam ka APHLC kawa katni da man kam ka UDP.
Da e nongmuna wa ha kani ka kynti ka UDP da yoh wa ar ko ha Gusuapara Constituency deiwa yoh 4286 Vote katwa ha Tura da yoh ko 4272 Vote, ha Damas 5868 Vote, ha Darugre 4448 Vote, ha Dengnapara 2729 Vote, ha Wajesik 2315 Vote wa kamtæ ter ter.
Kamtæ da ong wa hadien wa yoh ya kini ki Vote da sñiawskem wa ha Ri-loom Garo, ka UDP daw leh bha ko ha ka Election MLA ha u 2023.
Ka kyrwoh na u Dr. Jemino Mawthoh, General Secretary ka UDP.
