Da u- R Skhemroi Laloo
Jingim ha ka juk katni ha pyrthai,
Dap sa du i kynaad bichni wei chrai.
Kat chawa kyruiñ, kat chawa khmied;
Ym yoo poi thaw de ya ka mynried.
Synyaw wa sngi wa phet wa phar;
Hadooh i yukit wa khia wa boon ki mar.
Ha mynsien samen da kiat da kbai,
Hadooh wow thylliej da kliang wa khlai.
Chitom saja wa ban beiñ ya i,
Neibynta u khoo ym yohsa u khayi.
Ya i suk i saiñ da yaleh u khynra,
Wa u nood u klong da piah da pra.
Ha pyrthai sngi wym ye u chongkli kti,
Lei jar i yumut da kyrñiom lut ka i;
Cheiwon u phet cheiwon u rieh,
Chapoh ki khloo la kam ki chrieh.
Duhai hi don ha i samen,
Khnang yow yoh yei suk yei kmen;
Da tymmen da tado ha i yooluti,
Mynnu u poi ka sngi wa bha ya i?
U tre na jrong u wow pait wow sylli,
Hadooh wa kut ki sngi i lai luti;
Ha oo hi don u ksoh u hun,
Yei pynlai wa stat iwa chongkun.
Ham tieñ ham sorsa, ham sñiaw silet;
Hei thaw wa sboh yow kba u bet;
Salonsar ya i da e ka bhah,
To ya sumaar syndong ham ya kwah rhah.
