Ki Doctor ka jylla Meghalaya da ban joor ki yei emkaam wow wan chakhmat yow chim yei dawai yada na u COVID-19 khamtam ha ini i por wa da joor biang i ku kiwa dang yoh ya uni u khñiang hapoh ka ri wa hapoh ka jylla leh kamjooh.
U Director of Health Services (MI), u Dr. Aman War da pyntip u wa i pynjoor yei e dawai yada daw sdang na Shillong wei daw leh kamjooh cha kiwi ki bynta ka jylla.
U Dr. War da ong u wa hanla da dep yoh ya ini i dawai hap hi wow bood ya ki kyndon yada na kani ka khlam.
U Dr. Vijay Nongpyiur, Pulmonologist ka NEIGRIHMS da ong u wa em hi kiwa dang yoh ya uni u khñiang hanla da dep ki wow yoh yei dawai yada tangwa ym em won chah ktah ki deiwa joor.
“I dawai tika ym toh i wow pynchait tangwa daw yarap i wow pynduna yei joor i chah ktah lada chah ktah wei pynduna i leh yei laad wa ye u yoh ya uni u khñiang,” da ong u Dr. Nongpyiur.
Da ong u leh wa emkaam wow pyndooh yei tieñ wei sñiawthooh bakla ya ini i dawai tika.
Ki heh ka chnat i chait i khiah hapoh ka jylla da pyntip ki wa kamwa man kattæ hapoh Meghalaya em ko sa kamwa 80,000 sien iwa ye u e ya ini i dawai iwa daw neh kamwa 10 sngi.
U Director of Health Services da pyntip u leh wa ka chnat da pynkhreh ko ya ka TB Hospital ha Umsawli yow booh kam ka COVID-19 Hospital manda em ki kaam wa jhan.
U Dr. War da pyntip u leh wa ka sorkar jylla da em ko 32 tylli ki ki kor e Oxygen kiwa pynemkaam deiwa thap chapoh cha’oh (Invasive) deiwa e yarap ka Ministry of Health and Family Welfare wei da emkaam sa 54 tylli ki kor e la-ær kiwa ym emkaam wow thap chapoh cha’oh (Non-Invasive) kiwa em ya 75 BiPAPs (Bilevel Positive Airway Pressure).
U Director of Health Services da pyntip u leh wa ka jylla em ko kamwa 609 tylli ki thawthiah wa pyndait wa ka la-ær Oxygen deilang wa ki 65 tylli ki thawthiah ha ki ICU. Chooh chooh da pyntip u wa hapoh ka jylla em ko ka yong ka hi ka karkhana wa pynmih Oxygen wa em ha Byrnihat wei em leh ki Company kiwa pynbiang Oxygen cha ki Hospital kawa chna ha Amigaon.
U Dr. Rajeev Sarkar, Epidemiologist Indian Institute of Public Health (IIPH) da ong u wa hapoh ka jylla kattæ, u khñiang da poor smat u bar ya u iwa jia ha u snem wa da dep wei ki bru ha ki yaw ki haat leh ym em bood ki ya ka Social Distancing katkam wa da phah.
U Dr. Sarkar da ong u leh wa ynnin u snem da em ka Lockdown, heiwa da khang yei lai i wan ki paidbah deiwa pynrap wa em laad wa u yabi pyn na ki bru wa ya tipmit i.
