Hadien wa ku syndet kiwa yoh ya u COVID-19 ha kylleiñ ka ri kamjooh ha jylla Assam wa ka Meghalaya, da pynpyrkhat i ya kiwa boon na kiwa chong chnong kiwa em ha khappood ki ar jylla khamtam kiwa em ki sarok wa pynyabi ya ki ar jylla mynnu wei kammon u leh ka sorkar ya kini ki sarok lada u khang ya ki kamwa da leh heipor Lockdown yong u snem wa dadep.
Hajrong ini, hawa yaklam wa u DC ka West Jaiñtia Hills, u Garod LSN Dykes da pyntip u wa ha West Jaiñtia em le tylli ki sarok kiwa pynyabi ya ki ar jylla wei kitæ kynthup ki ya ka Khanduli, Tihwieh (Sahsniang) wa Saphai (Garampani) wei ka sorkar ym em u booh ko ya ki kam ki Entry Exit Point.
Da ong u wa ha u snem wa dadep leh heipor wa em ka Lockdown, ka sorkar ym em u tip ko ya ki kam ki Entry/Exit Point neibhah wa kini ki sarok da pynemkaam wow kit ya ki mar rep donhi wei ym man ki kam ki sarok wa wan psiah ki bru kam na Guwahati wa Silchar.
Chooh chooh da ong u wa ki bor District booddien ki yeini man-ka-sngi wei lada emkaam næ dawa i kaam wei lada pynyoo wa em boon kiwa chah ktah ha uni u khñiang ha ki yaw wa em ha khappood ha Dima Hasao District wa West Karbi Anglong District, neiliang ki bor sorkar daw leh ki yeiwa emkaam.
Heijooh i por, u Garod da ong u wa ka sorkar pyrdi ym em u khang ko yei lai i wan ki bru hapyrdi ki jylla wei da em leh ki kyndon kiwa hap bood ki bru manda psiah ki chapoh jylla.
Kam wow kdaw heini, ha Assam katkam wa man katni em palat 8,000 ngut kiwa dang chah ktah ha kani ka khlam.
