Ka Thma U Rangli-Juki (TUR) waka Workers Power of Meghalaya (WPM) da dawa ki wa ka sorkar jylla toh u e ko yei dawai tika yada na u COVID-19 dei mynkna cha waroh kiwa toh u yoh ya ini i dawai.
Ka TUR wa ka WPM da pynsñiaw ki yei khyrngiat yei leh ka sorkar pyrdi wow e laad ya ki bru samen næ ki Company wow booh dor hajrong i dawai yada COVID-19.
Da ong wa toh i kitkhlieh yong ka sorkar jylla wow pyntikna wa waroh kiwa chong chnong u yoh ki ya ini dawai smat katwa ye.
Ka TUR wa ka WPM da dawa ko leh wa lada ka sorkar jylla thmu biang ko wow khang sbak biang sa chisien ya ki kaam ki jaam, toh u rai wow wanrah biang yei yarap poisa ya kiwa mylla sngi wa kynthup ya kiwa chongdai madan, ki warep, kiwa kreh yung bru wa kiwa yah kari kamai.
Da kyntu joor ya ka sorkar jylla wow ekti wei wow chaniah biang ha ki dorbar chnong wei leh wow e yei kyrchaan poisa rap boon ya ki dorbar chnong khnang wow ye ki u kreh rap bha ha kani ka sien wa ar.
