Hadien wa yoh yutip wa daw poi i drug Cocaine hapoh kawi ka tadong kit mar (Container) kawa wan na baar ri kawa poi ha VO Chidambarnar Port, Tuticorin, TN, ki sahep ka Directorate of Revenue Intelligence (DRI) da lai kem ki ya kani ka Container kawa ha ki kot ki sla toh kawa kit dieñ.
Kani ka Container toh kawa kit nyngkong na Panama kawa da lai luti na ki thaw sangeh jhaad ka Antwerp, Belgium wa Colombo, Sri Lanka chwa wow poi ko cha India.
Hapoh kani ka Container da chem ya 9 tylli ki synduk kiwa da murieh ha khap ki dieñ lyngkhot wei hadien wa wai ya kini ki synduk da chem ya 302 tylli ki yusong wa soo dong kam ki moo blok
Kini waroh toh kiwa khia 303 kg wei toh kiwa suba toh i Cocaine iwa chongdor T. 2000 klur. Ya kini waroh nadooh nadooh ki dieñ wa ki drugs da kem wei da pynngat hapoh ka aiñ NDPS Act, 1985.
Ka takit dang pteiñ ko yow chem neiwon mih nyngkong ini i drug.
