Ka sorkar jylla ynne ka sngi da phah wei kyntu ko ya ki paidbah na kiwi ki District wow kiar nei wan cha nongbah Shillong lada ym toh i kaam wa jhan, khnang wow lait na iwon iwon i maa nei yabi u khñiang COVID-19.
U Symbood Montri Rangbah ka jylla, u Prestone Tynsong da ong u ham wan cha Shillong lada ym toh i kaam wa jhan iwa ym hoi u dam, wei neibynta wow khanglaad ya ki paidbah na kiwi ki thaw wow wan ki cha Shillong, ka sorkar da chim ko ya i rai ynnin ka sngi yow khang chwa ya ki kattu katni ki dukan kiwa em ha ka nongbah.
Ka sorkar ynne ka sngi da lum ko ya ka yalang yong waroh ki MLA na ki Constituency wa haap hapoh u pood yong ka sor Shillong neibynta wow ya krehlang wa ka sorkar hei wow yakhun ya i ku smat kiwa yoh COVID-19.
Ha kani ka yalang neiliang ka sorkar da paan ko yei kyrchaan na waroh ki MLA, wei kamjooh wow chim ya ka rai wow pynkhai im biang ya ki Covid Management Committee ha ki Constituency wei wow bichaar ya i long i man, wei wow e laad u pynsñiaw leh ha ka sorkar.
U Prestone uwa man leh uwa e ktien ka MDA, da pyntip u wa ka yalang man ko kawa mihsoh heiwa waroh ki MLA na ki 7 tylli ki Constituency kiwa em ha sor Shillong da mynjur ki wow ya krehlang, heiwa da em leh chiboon i e yumut, khamtam wow rap pynheh ya ka thaw chim nongmuna ha ka khyrdop kawa em ha Umling, Ribhoi District.
