Ka Tia Chaphrang Higher Secondery School, Sohkymphor chirup i krehlang wa u Range Forest Officer, Social Forestry, Khliehriat Range, EJHD da lehwarom ko ya ka ‘Earth Day’ ha ka 22 tarik uni u bnai hajrong ka phang “Restore Our Earth” deiwa thung ya ki tre dieñ ha pchem ka skur.
Ha chwa wow sdang i thung dieñ da em ka yalang wa tbian heiwa u Damewanhi L. Rymbai, Chairman ka Moolamylliang Biodiversity Management Committee, da man u kam u kongsan hei emlang u B. Dhar, Forester, Khliehriat Range, u Kmen Lapasam, Waheh Chnong ka Sohkymphor Mission, u Sevenborn Tang, Ex- MDC JHADC, u P. Suiam, ka Liancy Suchiang, ki tre skur wa ki dkhot ka SMC.
Hawa e i klam, u Reachingson Siangshai, u dkhot ka SMC, da pynsñiaw u wa ka skur da booh thong ko wow thung uwi u tre dieñ mar samen ki khynnah skur wa kiwa sikai leh kamjooh ya kawa da tip kam ka ‘One Student One Tree, One Teacher One Tree’ ha uni u snem, khnang wow embynta ki wa ki bru ha chi tyllup ka pyrthai wow pynwandur biang ya ka pyrthai (Restore Our Earth) katkam ka phang.
U Damewanhi L. Rymbai, kam u kongsan, da pynsñiaw u yei emkaam wow leh ya kiwa boon ki bynta khnang wow pynwandur biang ya ka pyrthai deiwa kyntu ya waroh wow kynmoo ki ya ki 3Rs (Reduce, Reuse & Recycle) man-ka-sngi khnang wow ye u pynduna ya ki jhep. Da kyntu u leh ya waroh wow thung wei wow sumaar ya ki tre dieñ khnang wow yoh ya ka la’ær Oxygen kawa khooid, khnang wow em ki um wei wow yada leh nei oor khyndaw.
U Rymbai da e yumut u leh ya ka skur wow em da ka Eco Club ka wow tipmit da ka Forest Department khnang wa ka skur u yoh yarap ko wow poi ha ka thong katkam wa da angnood.
“Ka Forest Department da smat ko wow ksohkti lang wa ka skur khnang wow e tre dieñ chooh chooh chirrup wa kiwi ki laad yarap khnang wow poi ha ka thong,” da ong u S. Dhar, Forester, Khliehriat Range.
Kiwi kiwa da klam toh u Kmen Lapasam, Waheh Chnong, u P. Suiam, ka Mayalang Suchiang, ka Merciful Lyngdoh wa ka Rikhienlang Sumar wa kiwi kiwi.
Hadien ka yalang, u kongsan da yahkhmat u wow thung ya ki 100 tylli ki tre dieñ ha pchem ka skur chirup wa kiwa chah khut sñiawbha, kiwa sikai wa ki khynnah skur ki wow pteiñ wow pynwandur biang ya ka mynried.