Ynne ka 24 tarik, ka Dorbar Chnong Lumputhoi hapoh i yahkhmat u Acting Waheh Chnong u S. Lyngdoh wa u General Secretary Chnong u S.P. Lyngdoh da e yarap ki cha ki arngut ki dkhot ka chnong, uwi wa dooh ya ki masi hei diñ u Yielding Lyngdoh wa ka Moit Lyngdoh kawa dooh yei kpær kseh hei diñ ha ka 8 wa 6 tarik u Thohlakhmi 2021.
Ini i e yarap man i kam i dak wow ya sñiawlem ya ki para wa chong chnong kiwa da chah ktah ha iwa jia sñiawsih kam ha i diñ. Man i leh kam i dak wow e mynsien ya ki yow yoh mynsien chooh chooh u nang pynbha yei mar rep kamjooh ya kiwa ri ki.
U Secretary chnong hei klam yong oo da kyntu u ya kiwa chah ktah wa ym toh u dooh mynsien ki na ini wa jia ya ki wei toh u pynheh chooh chooh ya i khih i khan. Deiwa ong leh wa hanla man i e yarap iwa khian leh, toh u pynemkaam hok ki yeini i e yarap ha ka rukom kawa toh khnang yow man i e yarap wa em yumut.
U Acting Waheh Chnong wa u Secretary Chnong da kyntu ki leh ya ki bor sorkar khamtam kiwa mihkhmat paidbah (MLA/MDC) wa toh u pait khmat ki cha ki manyung næ ki bru wa chah ktah ha kiwa boon ki rukom deiwa smat u e yarap kam i dak wow ya sñiawlem lang ya ki.
Kiwa chah ktah da sñiawngooh ki ya ka Dorbar Chnong, ya ki dkhot ka EC khamtam ya kiwa yahkhmat yong ka Dorbar Chnong. Da kitbok kitrwiang ki leh yow nang ye chooh chooh ki u thooh ki laad yarap ym toh du ya kiwa chah ktah kamjooh leh yei bha yei miat kamjooh yei kaam pynroi pynpaar hapoh ka chnong ka thaw hi waroh kawi, pynkut ka kyrwoh khubor na u General Secretary Chnong u S.P. Lyngdoh.