Ka seiñ Hynniewtrep Women Welfare & Development Organization (HWW&DO) ka seiñ ki manbei na Ri-loom Jaiñtia da pynman ki ya ka pynsñiawthooh paidbah namo ka Public Welfare Awareness Programme haka chnong Saphai, West Jaiñtia Hills District haka 23 tarik uni u bnai.
Ya ka yalang da pynman ha Community Hall yong ka chnong heiwa ka phang yong ka pynsñiawthooh paidbah toh “I sih nei chongkha dang khynnah wa i chah thombor ki khynnah kynthai.”
Da wan chimbynta da kiwa boon ngut ki khynnah skur kiwa puræ Class 8, 9 wa 10 yong ki artylli ki Secondary School yong ka chnong Saphai wa ki paaid chong chnong yong ka chnong Saphai kiwa da yoh yei pynche hajrong ki phang wa ka seiñ da booh ko.
Ki bru chemphang namo ki Resource Person kiwa da e yei klam hajrong kani ka phang toh ka W. Ksoo Superintendent Children’s Home Boys, Jowai kawa da klam hajrong i chah thombor wei chah tynyap ki khynnah kynthai katwa u Doctor W. Dkhar da e u i klam hajrong i sih i chongkha khynnah.
Da yoh leh yei klam ha kani ka sngi na u Waheh Chnong yong ka chnong Saphai u A. Bareh, u In-charge ka Saphai Police Outpost u R. Syngkon, u Adviser yong ka seiñ u C. Sungoh wa ka President yong ka seiñ ka O. Suchiang.
Ka W. Ksoo hawa e yei klam yong ka da ong ko wa i chah thombor chah tynyap yong ki kynthai lada man da kiwa ha yung ha sem, da u kurim yaka kurim, da ki payu para, da u panah yaka khonruit, ki chi lok chi chan lane da kiwa ya jooh ya jan ya tipmit hi, toh kiwa jooh pait, jooh yoo wei jooh lorni ya i dur i daar, ka rynyieñ ryniot, ki thaw lai thaw yieñ yong i. Kamtæ toh u man kiwa husiar wei kiar na kam kini ki bru wei lada yoo wa em i suba iyi iyi toh wow pyntip cha ki bor yong ka aiñ.
U Dr. W. Dkhar won hawa e yei klam yong oo da ong u wa i chongkha khynnah ktah i ha waroh ki liang ha i im ki bru, chah ktah i chait i khiah, ka manyung masnem, i pyrkhat pyrdaiñ, i yoh i kot, i pynpep yaka puræ puthi wei pynsih ko leh ya ka mynried yong ki khynnah wei ktah ko leh ya khon ki kti wa ya ki pateiñ kiwa daw wan yong ki. Najrong ini waroh, i chongkha hapoh i rta wa dang khian haap ko leh hapoh ki kyndon yong ka aiñ.
