Kam chibynta wow lehkmen ya ka National Panchayati Raj Day ynne ka 24 tarik, da pynman yaka yalang wa da chimbynta lyngba ka Internet heiwa u Prime Minister ka ri u Narendra Modi deiwa ya emlang u Union Minister ka Rural Development wa Panchayati u Narendra Singh Tomar da e ki yei klam cha ka ri.
Ha kani ka yalang da saam ya ki khusnaam National Panchayat Awards ha ki kyrdaan waphær waphær cha ki Panchayat wa ki Dorbar Chnong, wei da wai paidbah leh ya ka SWAMITVA Scheme hapoh ka ri deiwa saam leh ya ki e-Property Cards cha ki 4.09 lakh ki tre kiwa em ha ki 7 tylli ki jylla kiwa da saam da u Prime Minister lyngba ka Internet.
Da em 313 tylli ki Panchayati Raj Institutions (PRI) wa ki Dorbar Chnong kiwa da tipmit ya ki neibynta ki kaam wa bha yong ki wa da pynkrehkaam ki ya ka DDUPSP, NDRGGSP, GPDPA wa CFPGA. Ka Meghalaya kawa ym em ya ki PRI da tipmit ya ki hei pynkrehkaam ki ya ki Village Level Development Plan (VLDP) heiwa ka Mylliem Mawiong VEC ka Mylliem C&RD Block da yoh ko yei naam Gram Panchayat Development Plan Award 2021.
Ha kani ka yalang da emlang u Minister ka Community and Rural Development Department u Hamletson Dohling uwa da ekti ya ka Certificate cha ka VEC kawa da chimbynta ha kani ka yalang lyngba ka Internet. Ka VEC da yoh ko leh ya ka song poisa wa T. 500,000.
Ka VEC kawa jop toh kawa da leh bha ha kini ki 4 snem wa dep kam ha ka MGNREGA, PMAY-G, NSAP, DDU-GKY najrong wow pynkrehkaam ya ka VLDP.
