Ka synjuk yakrehlang wa yahkhmat ka Hynniewtrep Border Disputed Redressal Forum (HBDRF) deilang ka seiñ Hynñiewtrep Women Welfare & Development Organisation (HWW&DO) waka All Hynñiewtrep People United Front (AHPUF), ynne ka sngi da lai yachem ki ya u Deputy Commissioner ka West Jaiñtia Hills District wow dawa naki bor District wow chimkhia ki heiyatoh u e yada ya ki Khasi ki Pnar wa chong wa sah haki thaw khappood wa ka jylla Assam.
Neiliang kini ki seiñ da pynsñiaw ki yei parom wa sdang i chah lehbeiñ ki Pnar, itæ toh nadooh wa yoh laitlooid ka ri India ha u snem 1947, deiwa ong ki wa nadooh wa krehkaam ka Riti Synchaar ka ri India hapoh ka Six Schedule, da em i phiah yaki bynta ri-loom yong ka jylla Assam nei bynta u chna yaki District Council. Kamtæ da pynkhlaad yabor yaka Elaka Nongjrong Labang Nangphyllut naka Hima Khasi Jaiñtia chaka United Cachar & Mikirs Hills District. Nadooh itai i por ki Karbi da sdang ki wow pynyoo bor yaki paaid Khasi Pnar kiwa mantre waroh chi kattu.
Ha u snem 1971-72 neidaw wa em ka yakhih yow pynuiñ biang ya kani ka thaw cha Meghalaya, kamtæ ki Pnar da chah thombor ki haki pulit ka Assam wa ki paaid Karbi heiwa da hap ki wow ieh noh ya ki yung ki sem wei yut yap cha Barato, Mukroh wa cha Mynso kawa da tip kam ka Refugee Barato Camp.
Neitæ ha u snem 2003 da hap ki wow yut biang cha Sahsniang neidaw i thom bor ha ki seiñ kieñ suloi ka Karbi, wei kamjooh ha u snem 2015 da hap ki wow yut biang cha Moolber, cha Namdong wa cha Jowai.
Chooh chooh ong ki wym du itæ wei wot neipor chei por ki jait bru Pnar maad ki yei saja i eh i khoo.
Da pynkynmoo haroh ki wa wot ha kini ki kajiak sngi wa dep, da yoo wa ki pulit Assam wa ki paaid Karbi dang wan thombor ki yaki dkhot ka UHM haka chnong Saba, ka thaw wa dang haap hapyrdi i khajia pood.
Da booh kylli ki wa ileh ka Assam ka nood ko wow wan pynyoo bor wei kamtre ya kani ka thaw katwa ka Meghalaya wym nood ko?
Sa katwon ka jylla Meghalaya da jan dap ko 50 snem i rta, tangwa man i yoo sarom yaka jylla yong i kawa da lai luti 49 snem khloom u pood u ang.
Neiliang kini ki seiñ da beiñ joor ki yaka sorkar NPP wa chet kylla ko yaki paaid wa chong chnong ka jylla Meghalaya heiyatoh wa u pood u ang.
Neitæ da beiñ haroh ki ya ki pulit ka Assam wa ki paaid bhur Karbi kiwa wan thombor yaki dkhot ka seiñ UHM, wei kyntu ki leh yaka sorkar wow chimkhia ko hajrong ini i jia, najrong i pyn-eh bok pyn-eh nasib yaki khlawait wa chlur yong a jaitbru yow yoh smat ki yei chait i khiah.
Kamtæ kini ki seiñ wa yahkhmat da u C. Sungoh Chairman-HBDRF, ka O. Suchiang President-HWW&DO wa u J. Phawa President-AHPUF da dawa ki leh ya u Deputy Commissioner wow yaklam joor waki bor District yong ka West Karbi Anglong khnang yow wanrah yei chong suk chong chngaaiñ haki thaw wa em i kajia pood.
