U Montri Rangbah ka jylla, u Conrad Kongal Sangma da ong u wa lada i yabi u khniang COVID-19 ku i kamwa man katni, hapyrdi u Naisan daw kynjoh i cha ka 5000 ngut kiwa chah ktah.
Da ong u wa ka sorkar hadien wa da bichaar bha ko yeini i ku katni ympu emkaam u chim ya ki laad wa khor wow yada, deiwa kyntu leh ya ki paidbah wow chim ya i tika.
Chooh chooh ka sorkar da chim ko ya ka rai wow kdoh wow khoom yei yabi ka khlam wei yeiwa emkaam daw pynbna da jar jiar ki Deputy Commissioner.
Da ong u wa kiwa boon na kiwa uiñ cha ka jylla da chem wa chah ktah ki ha uni u khñiang, wei ini booh i hei maa neibhah kamwa 65% na kiwa wan na baar da chem wa chah ktah ki ha u COVID-19 wei wow yada hajrong ka RT-PCR kawa wa emkaam bait wow leh, ka sorkar da hukum ko wow chong ki hapoh yung hadooh 7 sngi hanla ka Test man Negative ko.
U Conrad da ong u leh wa ka sorkar da pynbiang lut ko ya ki tiar yakhun ya ka khlam COVID-19 nadooh ki dawai, ki Oxygen wa kiwi kiwi wei ynne heipor wa lai pait ya i thaw pynmih Oxygen ha Byrnihat, da tikna wa kani ka thaw daw ye ko u pyndap yeiwa emkaam ka jylla.
Da pyntip u leh wa ka sorkar pyrdi daw pynbiang ko sa 6 tylli ki thaw pynmih Oxygen ha ka jylla hapoh chi bnai.
Chooh chooh da pyntip u wa ka sorkar da pynbiang wei da pynboon chooh chooh ko ya ki thawthiah ha waroh ki District wei daw pynkhlan ya i rukom sumaar cha ki thaw palatsor.
