Kam chibynta u pyntikna wa ki luti lai kjat, ki rood sarok u man kiwa sawar neibynta i lai i wan ki paidbah, ynne i step neilaing ka Synjuk Waheh Chnong Jowai, chiruplang ki bor District ka West Jaiñtia Hills wa kynthup leh yaka Jowai Municipal Board waki pulit da lai ki cha ki yaw ha Jowai yow khang ya ki bru wa dai rood sarok neibhah wa i em kiwa chongdai ha ki rood sarok, ki luti lai kjat wanrah ko yei thut i lai i wan ki paidbah, ki khynnah skur najrong wa booh ko leh hei maa hawa lai wa wan.
Heijooh i por leh da pynkynmoo ki ya ki paidbah kiwa chongdai wow man kiwa syndong ya idæ deiwa deiñ tikna yaki Mask najrong wa bood leh ya ki kyndon sorkar lyngba ka chnat i chait i khiah heiyatoh wow yada yaka khlam COVID-19 kawa nang poor kat dang mih ki sngi.
Neiliang ki bor ka District West Jaiñtia Hills da emlang u P.K. Boro ADC, ka Y.R. Mawlong EAC, katwa neiliang ka Synjuk Waheh Chnong Jowai da emlang nadooh u President u A. Ñiangti, u General Secretary u Riquoma Laloo deilang wa ki dkhot najrong kiwi tawan.
Yeini da leh hadien wa neiliang ki bor District lyngba u Deputy Commissioner da pynmih u yaka hukum haka 25 tarik wa nadooh hynne ka sngi wym hoi de u em kiwa chnongdai harood sarok.
