Ka San Chnong Development Organisation wa kynthup yaka chnong Barato, Mukroh, Saba, Maitdeiñ wa Longkynshur ynne ka sngi da lai yachem ki wa u Deputy Commissioner ka West Jaiñtia Hills District, wei da dawa leh wow tympra yaka Border Police Outpost yong ka sorkar Assam (West Karbi Anglong District) kawa da chna haka chnong Saba, deiwa ong wa kani ka thaw dang haap ko hapoh u pood u ang ka Meghalaya.
Kiwa yahkhmat yong kitai ki 5 chnong hawa klam cha kiwa thoh khubor ong ki wa nadooh ka sngi wa thombor ki paaid ka Umkhermi yaki dkhot ka UHM kiwa thmu du kat u lai pait donhi ya i chna pyrchah ka aiñ ka Assam, katni wym ym em de chngaaiñ ki u lai u wan ne lai bri ha katai ka thaaiñ neidaw i chah kdong haki bru wa pynthut yei chongsuk chong chngaaiñ ka thaaiñ.
Ong haroh ki wa i yoh laad ka Assam wow chna yaka Border Police Outpost ha katai ka thaw daw booh ko hei maa yaki paaid Pnar kamjooh ka mynried, neibhah i chah pyndik ki bru haki thaaiñ khappood jia ki nei por chei por.
Chooh chooh ong ki wa katai ka Outpost wa chna da ka sorkar Assam pynartatieñ haroh ko wa ye u em iyi re iyi cha kylla neibhah wa katai ka thaw wym em jngai ko naka Outpost ka Assam kawa em ha Mukoilum kawa du kamwa 3 ne 4 kilometer.
Kamtæ da kyrpaad joor ki yaka sorkar wow chimkhia ko u pynbait smat yow pood u ang, najrong wow smat booh leh yaka Border Police Outpost ha chnong Mukroh lane Saba khnang yow chngaaiñ i lai i wan ki paidbah.
Da ong ki wa lada neh kamni daw poi i por wa ka Assam u kam lut ko yaki thaw ka Meghalaya wei kiwa chong chnong daw kylla palat chnong ki hei thaw yong ki hi.
Da pynrap haroh wa i chna ya katai ka Outpost man kawa smat bha wei dang pteiñ i leh hadooh katni, najrong wa katni nadooh wa jia i chah thombor ki dkhot ka UHM, ka Assam da booh haroh ko sa kiwa yang sonteri neibynta ki wakreh ya katai ka yung krehkaam.
Neiliang u MDC ka 12-Barato Mukroh Constituency u A. Shadap da beiñ joor u yei wym burom ka Assam yei yasoi hapyrdi ki ar DC yong ki ar jylla itæ toh wow ya pyntip kylliang hachwa wow chna ya iyi iyi næ hawa wanrah yei roi i paar.
Hajrong ini da ban joor u wa ka sorkar jylla toh u chim noh ko da ka luti wa rap khor neibhah waka Assam ym em kheiñ ko, lym kamtæ ym ye u tip sa katwon ngut ki mynsien bru wow dooh du neidaw u pood u ang.
Khana ki wa hei lai yachem yong ki wa u DC da kular u wow chimkhia wei ki bor District leh u hiar lai pait ki ya katai ka thaw mynstep ka sngi.
Heini i lai yachem da emlang u waheh chnong ka Saba u Andreas Suchiang, u President ka San Chnong Development Organization u Hamboide Sumer, u Secretary u Daiehnoh Timung, u Waheh Chnong Maitdeiñ u Daarphi Sariang, u Waheh Chnong Ïongkynshur u Marwos Suchiang, u Waheh Chnong Barato u Nihun Sten wa kiwi deilang wa u MDC ka thaaiñ u A. Shadap.
