Ka Hynniewtrep Integrated Territorial Organisation (HITO) Central Body ynnin ka sngi hapoh i yahkhmat u President u Donbok Dkhar wa u Secretary u Wanbun N Dkhar da yachem ki ya u CEM wa u EM wa pait ya ka chnat khayi pateiñ da ki baar jylla hajrong ka dorkhat wa da dep e daka seiñ haka 23 tarik uni u bnai wow dawa naka Council wa ym toh de wow e wai cha ki bru samen ya ki khyrdop wow sylli ya ki kot ki sla ki kari baar jylla kiwa lai lyngba u pood u ang ka ri-loom Jaiñtia, kawi ha Sonapyrdi, East Jaiñtia wa kawi ha Mookyndur West Jaiñtia Hills.
Neiliang yong u CEM da mynjur u ya itai i dawa yong ka seiñ wow pynlai ya kitai ki khyrdop daka Council kam i pyrchang wa hadooh katwon i mih (Revenue) na kitai ki khyrdop neibhah kamwa da tip wa ha ki snem wa da dep, i e wai ya kitai ki khyrdop cha ki bru samen ym em da wanrah yei myntoi yaka Council heiwa da man pathan ko kam i dooh nong wei liat tooh ka poisa wa toh u poi cha ka Council katkam wa thmu.
Chooh chooh neiliang yong ka seiñ da ong ko wa ka yurim wa ka seiñ yieñ ko toh hadien wa da yoo wa stang poisa ka Council cha wa palat, wot tang wow su tulop ya ki wakreh leh da chem chitom wei ka seiñ leh da ong ko wa daw booddien ko ya ini ha waroh ki liang kamjooh leh da kyntu ya ka Council hi waroh wa lada nujor yaki artylli ki Council hapoh ka bri u Ynñiawtrep, ka JHADC man ko kawi na na ki Council kawa da chah yooh beiñ ha ka sorkar jylla ha waroh ki bynta wei toh hajrong kani ka yurim, ka seiñ da chim ko ya kani ka luti wow wan chakhmat wow ya phyllu yumut kammon wow pynbha pynmiat.
