U Director of Health Services (MI), u Dr. Aman War da pyntip u wa neiliang u Superintendent ka Shillong Civil Hospital uwa man leh u Joint Director ka DHS da pdiang u wa em i duna ha ki wakreh hajrong i slem wow e sumaar ya kawi ka manbei wa na Nongpoh, Ri-Bhoi District kawa da chah ktah ha u khñiang COVID-19 wei kawa da khlaad noh ha i step yong ka sngi nyngkong.
Kawi ka manbei kawa tip pyrtuid kam ka Uginia Rymbai da khlaad noh du neidaw wym chimkhia ka thaw sumaar, neibhah ya katai ka manbei da rah nyngkong cha Bethany Hospital ha Nongpoh heiwa da chem wa da chah ktah ko ha u COVID-19, wei neiliang kiwa ha yung da lai ki wow rah noh ha Nongpoh Civil Hospital, tangwa katai ka thaw sumaar leh ym ye ki wow pdiang neibhah wa ym em ki ya ka ICU. Hadien wa da chah kyntait wow sumaar ha ki Hospital ha Nongpoh, da pynkit noh ya ka Uginia cha Shillong Civil Hospital, wei ha Shillong leh da em i pynslem wow e sumaar neibhah wot uwa yang leh da khang u ya katai ka Hospital wei ym em u ha ka thaw yang næ khyrdop.
U DHS ynne ka sngi da pynche u wa hadien wa da chem wa kawi ka manbei da chah ktah ha ko ha u COVID-19, neiliang kiwa hayung da pynkit noh ki cha Nongpoh Civil Hospital, tangwa neidaw wa katai ka manbei da em ko leh yei chitom, da phah wow pynkit noh cha Shillong Civil Hospital wa rap biang i sumaar deiwa pyrchang wow pyntip chwa leh. Da pyntip u wa ha i por wa wan poi kawa kjut ha Shillong Civil Hospital ki wakreh ha katai ka Hospital em bait ki, tangwa da jia leh wa uwa yang yong katai ka Hospital da yoh thiah u, wei da chimpor leh neidaw wa ki Nurse kiwa em Duty ha itai i por hap ki wow sap PPE neibynta wow yada ya idæ, heiwa da pynrap wa hanla ki da yaleh ki wow sumaar tangwa neidaw wa ban i chitom da khlaad noh.
Chooh chooh u Dr. War da pyntip u wa ki thaw sumaar ya kiwa kjut na u COVID-19 em ko leh ha Civil Hospital, Nongpoh, wa ki thaw thiah kiwa em wa ki Oxygen, tangwa neidaw wa kawa kjut em ko leh ya kiwi ki chitom wei emkaam ya i sumaar wa rap bha, kamtæ da pynkit noh cha Shillong.
