Ki bor ka sorkar jylla wa ki bor District neipor cheipor da pynmih ki ya ki hukum wow pynkrehkaam ya ki kyndon yada na u COVID-19 kam wow sap ya ki mask, u jngai iwi na iwi wa kiwi ki kyndon wa da pynmih da ka chnat i chait i khiah.
Ki bor District ka East Jaiñtia Hills leh da pynmih ki ya ki kyndon wow bood ki Committee pynlai ya ki yaw hapoh ka District waroh kawi khamtam hadien wa da wan biang kani ka khlam COVID-19 ha ka sien wa ar.
Ynne ka sngi ka seiñ Meghalaya People United Front (MPUF-EJHD), hapoh i yahkhkat u President yong ka, u Kyrshan Blah da chem ko wa boon ki dukan wai bait ki kamwa jooh man hanla ki bor District da phah wai ki du ya ki dukan mar baam khlem bood ryntih ya ki hukum khamtam hei wow sap ya ki Mask.
Neiliang u Kyrshan Blah da kyntu u ya u DC khamtam ya kiwa kreh wow phah khang khyrdep noh ya kitu ki dukan ki wym emkaam wei wow phah ya ki dukan wow bood ya ki kyndon ka sorkar.
Chooh chooh ka seiñ da maham ko leh ya ki dukan ki wym bood ya ki kyndon u DC wow khang noh ya ki khnang wow yada nei poor kani ka khlam.
