Da u: Shimphang Lyngdoh, Lumputhoi
Na Kongong u lai chadooh Cham Cham,
Kat i rynyieñ yong pha wym em de wa tam;
Da kyrchah pho da ki rong boonjait,
Ki chkoor wa sñiaw ki khmat wa kwah u pait.
Nongkong nachwa nalap ki sngi,
Man pho kam ka thaw rep thaw khwe donhi;
I pyrtuid yong pha wym pu em u bna,
Wa dang man hi-eh pho kam ka thaw rep kba.
Kat nanglai ki sngi tyllung ki por,
Suki suki pha nangkhroh nangkjor;
Mynsien kiwa wan paitke su cha pha wa hær,
Cha Sahksaw-Sahksaw u ya phet ya mer.
Related posts
Ya ka chnong Cham Cham pha wa e baam e dih,
Chiboon ki paidbah na pha wa yoh khih;
Yoh u pynmiat pynbha yei doh yei pran yong pha,
Yow khriñ chooh chooh pho ya kiwa uiñke sñiawbha.
Ale waroh paralok wa maya,
Cha Sahksaw u lai ya baam sñiawbha;
Ka um wa khooid na ka Wah Myntdu,
Pahooh u sait u khleiñ u chet u tu.
Ki sim ki doh wa ki dakha dathli,
Emkaam bha wow pynneh pynsah ya ki;
Pynlait chooh chooh chiboon ki symbe,
Ham elaad wara u yoh ki bru wow khwe.
