Jowai : U CEM ka JHADC u ma Thombor Shiwat hei yaklam u wa u Wyrta ynne ka sngi ha kamra krehkaam yong oo da ong u wa i khrong dan ki Dolloi katkam wa da leh ki katni toh iwa man be-aiñ neidaw wa ka Council ym pu dep ko u chna ya ki kyndon aiñ hei yatoh wa kammon u khrong dan ki.
Da ong u leh wa katkam ka hukum ka Supreme Court da phah chna ko ya ki kyndon wa yatoh wa ka khrong dan (Customary Tax) ki Dolloi wei ini daw chimpor i u pyndep neidaw wa em ki Elaka toh kiwa da wiar ki “Customary Practice” yong ki hadooh ka niam leh.
Hadien wa dep u chna ya ki kyndon won daw phah cha ka Tax Advisory Committee yow pynpliah ya ki yow ye u pynman aiñ ya ki.
U ma Shiwat leh da ong u wa neilaing yong ki da thoh ki cha u DC wa u SP ka West Jaiñtia Hills hei yatoh wa ini yow pyndam chwa yeini i khrong dan ki Dolloi.
Da ong chooh chooh u wa ye u pyndooh ya ki sanad ki Dolloi neibha ha ka aiñ ka JHADC da booh wa lada ki Dolloi tyngkheiñ aiñ næ leh pyrchah ki ya ka Council ye u pyndam næ suspend ya ki.
Da pyntip u leh wa da dep yoh chithi ka council na u Muktiar (Lawyer) ki Dolloi kawa ong wa i pyrchang u khang ka Council man i i “Contempt of Court” næ iwa tyngkheiñ ya ka hukum ka Supreme Court wei neiliang ka Council da dep jubab wei da pynche ki yeidaw wa pyrchang u khang yei khrong dan ki dolloi cha ka Supreme Court.
Discussion about this post