Hadien wa pteiñ i ku kiwa dang chah ktah ha u COVID-19 ha Meghalaya heiwa ha kini ki 24 kynta da em hadooh 269 ngut kiwa dang yoh wa 6 ngut kiwa dang yap, neiliang ka sorkar jylla da chim ko ya i rai wow pynkhor chooh chooh ya ki kyndon deiwa pynkrehkaam ya ka Lockdown ha ka jylla.
Ynne da pynbna da ka Lockdown wa pura hapoh waroh kawi ka East Khasi Hills District kawa daw sdang nadooh myntu ka 5 tarik heipor 8:00 waje i miet hadooh 5 waje i step kani ka 10 tarik katwa ha waroh kiwi won ki District ka jylla da pynkrehkaam da ka Weekend Lockdown iwa mut wa krehkaam ka Lockdown ha ka Saturday wa Sunday donhi.
Ki Exam wa da booh wow pynman ha ka 6 wa 7 tarik uni u bnai da kyrriah cha ka 11 wa 12 tarik uni u bnai heiwa daw pynbna ka chnat puræ puthi ya i rukom pynman Exam.
Ynnin ka sngi hapoh ka jylla Meghalaya da tam kiwa dang chah ktah 2000 ngut deiwa em 2019 iwa ynne da ku cha 2135 ngut heiwa ha Shillong 17% na kiwa chah Test toh kiwa yoh ya uni u khñiang katwa ha East Khasi Hills won 12% na kiwa chah Test toh kiwa yoh ya uni u khñiang.
Ka sorkar da pyntip ko leh wa da poi 60% i dap ki Hospital ha Shillong, kamtæ da emkaam wow kdoh u khoom yei poor ka khlam.
Da ong leh wa ki kyndon wa da pynkrehkaam ini wa dep da yarap i wow pynduna yei boon i yalang ki bru kam ha ki yaw ki haat tangwa neidaw wa ku ma ku kiwa dang yoh ya u khñiang, ym yohsa de wei hap wow chim da ki rai wow pynrkhiñ chooh chooh ya ki kyndon.
Kamtæ da khang lut ya waroh ki yaw wa heh hapoh ka East Khasi Hills District deiwa chah wow wai ki dukan wa dai ya ki mar wa emkaam ha ki jar jiar ki dong wei da chah ya kiwa leh ya i Home Delivery. I lai i wan ki mar rep daw pynbait da ka DC.
Chah hi ya ki bia heiwa u em du 20 ngut kiwa chah khut sñiawbha deiwa yoh bor chwa na ka DC kamjooh leh hawa em kiwa yap.
Da rai leh wow khang yei lai ki kari hapyrdi ki District.
U montri rangbah ka jylla, u Conrad Sangma da ong u wa ka sorkar daw pynkrehkaam ko ya ki le jait ki kaam iwa kynthup ya i khoom i kdoh (Containment), i e tika (Vaccination) wa i sumaar (Treatment).
Da kyntu u leh ya ki paidbah wow krehlang ki wei wow bood ya ki kyndon sorkar.
Chooh da pyntip u leh wa ki montri ka sorkar daw lai ki cha ki District heiwa oo (Conrad) u lai u cha Tura, u symbood montri rangbah u Prestone Tynsong cha Nongstoin katwa u montri ki kaam pohtung cha Ri-loom Jaiñtia khnang wow booddien ki yei man i long ka khlam.
