Kam chibynta wow kdoh u khoom yei ye u poor ka khlam COVID-19 hapoh ka District, neiliang u Deputy Commissioner & Chairman District Disaster Management Authority, West Jaiñtia Hills da pynmih hukum u ya waroh kitu kiwa psiah chapoh ka jylla kiwa wan na baar jylla wa ya waroh kitu kiwa da yachem wa kiwa yoh COVID-19 wa hap ki wow chongkset ha yung namo wow leh ya ka Home Quarantine 7 sngi hanla ka Test Result man ko Negative namo kiwa ym em yoh ya u khñiang.
Ya ka hukum da pynmih neidaw wa ku kiwa yoh COVID-19 kamjooh kiwa da hap wow sah Hospital ha kylleiñ ka ri, kamtæ da emkaam wow thooh laad wow yada nei poor ka khlam hapoh ka jylla.
Chooh chooh ka hukum da ong ko waroh kiwa leh Quarantine hap ki wow deiñ ya ki Mask, u yajngai uwi ya uwi wei wow lehkhooid ya ki kti.
Waroh kiwa leh Quarantine toh u paitbniah bha ki yei chait i khiah yong ki. Lada yoh ki iwon iwon i dak i chin wa chitom wow pyntip ki cha ki thaw sumaar wa em chajan dooh lane cha ki ANM/ASHA lane deiwa phone ha u 14410-State Level COVID Helpline.
