Hadien wa ka United Democratic Party (UDP) da thoh ko cha u Montri Rangbah ka jylla, u Conrad Kongal Sangma wow dawa thung da ka takit wa laitlooid hajrong ki kaam ha ka Meghalaya Energy Corporation Limited (MeECL), ynne ka sngi da pdiang yeini waroh i dawa ka Party.
Neiliang u Conrad da ong u wa da thung ya ka takit wa khlieh da u Retired Judge wow kynthup leh ya ki ar ngut ki dkhot kiwa man ki sahep wa da chong-ngiah wow takit yei kaam baam-tooh ha ka chnat MeECL ka jylla.
Kam wow pynkynmoo heini, ki 10 tylli ki phang wa ka UDP da dawa ko na u Montri Rangbah toh hajrong i pynkrehkaam ya ka Saubhagya Scheme deiwa pynbad wa em i doohnong wa palat T. 100 klur nadooh wa khut ya ka Tender, i pyndait ya ki Smart Meter wa T. 3400 iwa neiliang ka Board da ong ko wa chongdor hadooh T. 9444.44, i thied ya ki 100 tylli ki Computer wa ki miej chuki hei dor wa T. 3 lak na ka Enterprise Resources Planning, i thung ya u Manish Gupta kam Adviser u Chairman-Cum-Managing Director ka MeECL wa kiwi kiwi ki Advisor, i thmu wow ekti ya ki 33/11 Kv Sub-Station cha ki karkhana kiwa na baar jylla, i e dor wa kyrpang ya ki karkhana ha Byrnihat iwa du T. 4.90 chi Unit iwa wanrah yei doohnong wa khroo ya ka MeECL.
Da dawa leh wow takit hajrong i pynsangeh namo i pyndooh bordiñ neibhah wa ka MeECL ym em thaw pynlang bordiñ ko, wow takit hajrong i chem u CMD ka MeECL wa em i tooh bordiñ ki karkhana ha Byrnihat, wa i thung ya u sahep wa dang khian kyrdan kam u Director ka Meghalaya Power Distribution Corporation Limited.
