Ka Hynñiewtrep Youths’ Council (HYC) Shillong City ynne ka sngi hadien wa chem wei yoo wa em i toor pood ki chipai Military Engineer Services (MES) chadooh chajan u sarok PWD wa em ha sarok Anjalee Petrol Pump. Neiliang ka seiñ da lai ujor ko cha ka Deputy commissioner ka East Khasi Hills District, ka Isawanda Laloo.
Ka seiñ da ong ko wa ki chipai da chim kabu ki neidaw wa em ka Lockdown ha Shillong, deiwa pyrchang wow toor pood na iwa jooh kær iwa da em nachwa deiwa poi katni cha sarok wa lai kari iwa da man i thaw ka PWD.
Ka seiñ da ong ko leh wa boi ye u man wa kam ha kini ki por wa ym em wa yoo ya ini i toor pood da leh chynnam ki chipai ya ini i kaam pyrchah aiñ. Ka seiñ ka dawa joor ko na ki bor District wow tuklar wei wow phah sangeh syndon ya ini i kaam ki chipai lym kamtæ ka seiñ hi ym banse ko wow mih hi cha sarok yow lai pyndam yei kær wa da pynyieñ da kini ki chipai kiwa em ha kani ka thaw.
Ka seiñ da ong chooh chooh ko wa lada e laad wei lada ka sorkar leh u man ko du kam kawa paitke hi-eh næ kawa thlah ya kam kini ki kaam ki chipai, du hadien 5-10 snem daw booh khyrdop ki chipai da kawa heh ha chwa wow psiah ha Iew Mawlong kamwa jia ha Mawshbuit.
