Ynne ka sngi ki soo ngut ki MLA yong ka Ri-loom Jaiñtia wa kynthup ya u Lahkmen Rymbui, u Sniawbhalang Dhar, kiwa man leh ki montri ka sorkar jylla, u Comingone Ymbon wa u Wailadmiki Shylla da wan booddien ki yei pynkhreh wow yakhun ya ka khlam COVID-19 ha West Jaiñtia Hills.
Ha kani ka yalang da emlang u Deputy Commissioner, West Jaiñtia Hills District, Garod LSN Dykes, ki sahep ka chnat i chait i khiah wa kiwi kiwi.
Hadien i yalang da rai wow tyrwa na ka sorkar wow booh ya ka Corona Care Center kawa pura hapoh District, u pynboon ya ka Ambulance 108 wa kiwi kiwi ki kaam wow yakhun ya ka khlam.
Hawa yaklam wa u montri ki kaam pohyung ka jylla, u Lahkmen Rymbui da ong u wa i kreh ha ka Oxygen Plant Jowai Civil Hospital, Ialong dang lai i chaphrang.
Heijooh i por da pynchlur u ya ki paidbah khamtam kiwa 45 snem chajrong wow chim ya i tika yada COVID-19 neibhah hadooh wa man kattæ dang em du 36.6 percent kiwa da chim tika.
Da pynrap u leh wa na ki 41,000 ngut kiwa em 45 snem chaneiñ, kiwa chim tika da em du kamwa 14,000 ngut katwa kamtæ emkaam wow pynchlur ya ki paidbah wow wan chim ki ya ini i dawai. Da pynchlur u leh ya kiwa yah kari wow wan chim ki ya ini i dawai tika.
U Lahkmen da kyntu u leh wow bood ya ki kyndon wei wow pynduna ya ki bru ha ki yung wa em wa khlaad wei kamjooh kiwa em i bia.
Da pyntip u leh wa ya ki rai na kani ka yalang daw yaklam wa ka sorkar ha ka 8 tarik heipor wa man yalang ka dhab ki montri wa u montri rangbah ka jylla.
