Da u: Shimphang Lyngdoh, Lumputhoi
Ka juk pyrthai katni kawa yoo maa,
Kat chawa mut u lai leh da sñiaw saja;
Su i eh i khoo ha nga ha phi wa chem,
Ha yung bait u ya chong la kam ka syiar pdem.
Ptai i mynsien wym yoh de kamwa mut,
Du ha chnong u chong leh da sñiaw man kjut;
Ka khih ka kreh i kiwa mylla nongsngi,
Ki luti syngkieñ la waroh da khang chabi.
Chong khop ha yung sait kti wow deiñ mask,
Wym hoi u leh katwa mon wa ngait;
Ya u khñiang Corona waroh wa ya tieñ,
Khamtam kiwa da dap 45 snem chaneiñ.
Related posts
Ya i kattu su i chah khoom chah kdoh,
Lada kamni daw yap thngan lut waroh;
Pyn-ar ki khmat wa pait cha timun tidiang,
Na ka chnat sorkar leh wym ye ko u pynbiang.
Wym yoh de u lai kat chawa mut wa thmu,
Ki kaam da sahteiñ lut waroh kattu;
Ka pap kam kani wym jooh sñiaw kat tynde,
Neidaw wa em ka kjut Kobit-Khat-Khynde.
Su cha me Aa Blai i wa pait wa khmied,
Tip kammon wow jia ya i mynried?
Kat nang lai ki sngi ka kjut nang joor nang joor,
Su ki khubor wa sih u sñiaw da khlot wa ki chkur.
U Blai wa stat da tynjooh mi ya i,
Da kani ka kjut wa khlan u yabi;
Na ki parom yongrim ha i kattu da chem,
Ka kjut waphær waphær da jia man ka chispah snem.
