Ka Weekend Lockdown kawa krehkaam kattæ daw kut noh ko ha i step ka 10 tarik uni u bnai heipor 5:00 waje i step, kamtæ neiliang u District Magistrate ka West Jaiñtia Hills da pynmih hukum u ynne ka 9 tarik hapoh ka Section 144 Cr.PC deilang wa ka Regulation 3 ka Meghalaya Epidemic Diseases, COVID-19 Regulation 2020 wa nadooh ka 5:00 waje i step ka 10-05-21 hadooh wa pynmih hukum da kamwi yow pynbna ya ki kaam wa khang wa kiwa chah hapoh waroh kawi ka District kiwa man kamni ha wah:
Manda em cha lait ha ki thaw wa em bru hap wow deiñ ya ki Mask, u yajngai 6 phut uwi ya uwi, u tymmoh ya i ktien i khmut hawa ky’oh wa synrieh wei wow bood leh ya kiwi ki kyndon sorkar kiwa da pynmih na i por cha ki por wow yada na ka khlam COVID-19.
Ki kari wa kit yow dai Wholesale ya ki jhoor ym chah wow psiah ki cha ki yaw wa em ha Jowai wei kini ki kari toh u lai pynhiar ki ya ki mar ha ka yaw Ialong Lay-By Market kawa da sdang pynkrehkaam biang.
Da khang wow pynman ya kiwon kiwon ki jait yalang paidbah.
Waroh ki thaw puræ wa em ha Jowai u man ki kiwa khang. Ki Dorbar Chnong wa ki School Managing Committee kiwa em cha ki thaw palatsor ye ki wow khang ya ki skur lada emkaam deiwa yaklam chwa wa ki heh ka chnat i chait i khiah, ka District School Education Officer, West Jaiñtia Hills wa ka yung krehkaam u DC.
Ki kari wa lai luti na ka District chah hi wow pynyieñ ki ha kiwon kiwon ki chnong harood u sarok NH-06 (uwa tip nachwa kam u NH-44) ha ki bynta wa em hapoh ka WJH District.
Waroh ki thaw psiah kiwa uiñke suwari kiwa na baar ka jylla wa kiwa wan na ki Containment Area wa em hapoh ka jylla ym chah ya ki, wei waroh ki thaw uiñke suwari u man ki kiwa khang.
Ym chah leh wow pynman ya kiwon kiwon ki yalehke Sports.
Ya kiwa lai wa wan ha ki thaw paidbah, kiwa psiah cha ki dukan, kiwa chong ha ki kari kamai lada ym deiñ Mask ki, daw chah daiñ kuna ki hadooh T. 1000.
Kiwi de ki kyndon man ki kamni ha wah:
Ki bru wa psiah chapoh ka District na Saphai, Tihwieh (Sahsniang) Mukroh wa Khanduli hap ki wow Register chwa ha Meghalayaonline.gov.in/covid/login.htm. Kiwon kiwon kiwa psiah khlem da leh ya ki Test lane khlem da pyntip chwa cha ki Waheh Chnong wa kiwi wa pait ya ini, daw chah pynchitom ki katkam ka aiñ.
Ki dukan, ki Restaurant wa ki Bar wa em ha West Jaiñtia Hills toh u khang ki chwa 9:00 waje i miet.
Ki Hotel hap ki wow paan ya ka COVID Negative Certificate na ki bru wa wan na baar ka jylla.
Ha ki yalang paidbah kiwa da yoh bor wow pynman, lada pynman ha ki thaw wa em hapoh, u chah du 50 ngut donhi ki bru wei lada pynman cha lait u chah 100 ngut donhi ki bru.
Ha ki bia won, ym chah wow em palat 30 ngut ki bru. Katwa hei yap bru won toh u em 30 ngut donhi ki bru wei toh u booh ya ka Register yow tipmit ya kiwa wan kiwa emkaam wow yoh bor chwa.
Ki yalehke Sports kiwa da yoh bor wow pynman, chah u wan kiwa paitke hadooh 100 ngut donhi.
Ki thaw maneblai u krehkaam ki deiwa chah u em ki bru 30% donhi deiwa bood ya ki kyndon yada.
Ym chah ya kiwon kiwon kiwa chongdai kiwa tyrwa mar wow leh ki ya ini ha ki rood sarok wa ki luti lai kjat wa em ha ka chnong Jowai iwa pynthut yei lai i wan ki bru.
I wai ka Iawthymme, Ladthadlaboh, Iawmusiang Pohyaw, Yaw Chor, ka Yaw Seiñraij, Yaw Chyiap, Chutwakhu wa ki yaw kam ka Iawpynsin (Wahiajer), Iawmuchai (Shangpung), Iaw Raliang, Iaw Khanduli, Iaw Namdong, Iaw Muksoo (Mowkaiaw), Iaw Sahsniang wa Iawthymme (Saphai) u chah u wai ki nadooh ka 11-05-21 nadooh 9:00 waje i step hadooh 5:00 waje i miet deiwa bood ya kini ki kyndon ha wah:
- Ki Secretary Market Committee toh u pynkrehkaam biang ki ya ki Market Committee.
- Hap wow Register ya waroh ki dukan. Du ki dukan wa da dep Register wa ki Market Committee kiwa ye wow wai.
- Ym chah wow chondai ya kiwon kiwon ki mar ha ki luti lai kjat.
- I wai dukan toh deiwa bood da ka Even/Odd Number heiwa ki Even Number u wai ki haka Monday, Wednesday wa Friday katwa ki Odd Number u wai ki ha ka Tuesday wa Thursday.
- Ki jar jiar ki Dorbar Chnong wa em ha West Jaiñtia Hills da pynchlur ya ki wow wai da ki yaw wa khian ha ki jar jiar ki dong yong ki.
- Ki thaw baam wa ki thaw ah sñiooh chah hi wow psiah kiwa wan yei kaam chapoh dukan wei ki bru wa em ym toh u em ki palat 50% na iwa hoi u em ki bru.
- Ya kiwi won ki jait dukkan, ki tre dukan hap ki wow kær ya ki dukan yow pyntikna wa ki bru ym psiah ki chapoh i dukan.
- Ym toh wow dai mar cha kitu kiwa ym em deiñ Mask wei toh leh u em ki Volunteer, ki wakreh yow pyntikna wa bood ki bru ya ki kyndon yada na ka khlam.
- Ki dukan wa leh pyrchah daw chah khang ki.
Ki dukan wa dai ya ki mar wa emkaam, ki dukan Hardware kiwa em ha Ummulong, Ialong, Pasyih wa Phramer kiwa em harood ka NH-06 kawa jooh tip kam ka NH-44, u wai ki Monday hadooh Friday nadooh 9:00 waje i step hadooh 5:00 waje i janmiet deiwa bood ya ka Odd/Even Number. Kiwa leh pyrchah daw chah khang i dukan.
I krehkaam ka Lay-by Market ha Ialong daw pynbait da ka Ialong Lay-by Market Committee deiwa bood leh ya ki kyndon yada na ka khlam COVID-19.
Ki yung krehkaam sorkar u krehkaam ki deiwa pynduna ya ki bru wakreh katkam ka hukum wa da dep pynmih haka 30-04-21.
Ya kiwa leh pyrchah u pynchitom katkam ka kyndon Section 51(b) ka Disaster Management Act, 2005.
