Ynne ka sngi kawa man ka sngi wa da wai biang ya ka chnong Jowai kamjooh ya waroh kawi ka West Jaiñtia Hills hadien wa kut ka Weekend Lockdown, da sakhi yei boon ki bru khlem bood ya ki kyndon yada na ka khlam COVID-19 ha ki thaw wa pynman yaw ha Iawmusiang, Jowai.
Hadien ini neiliang ka Market Committee ka Seiñraij Jowai da chong pyrkhat ko yeini heiwa da rai wow khang noh chwa chipor nadooh mynstep kamwa chi tayaw ya ki yaw wa em hapoh i pait i yoo yong ka namo ki yaw Seiñraij.
Neiliang u General Secretary ka Seiñraij Jowai, u A. Sumer da ong u wa da rai wow khang noh ya ki yaw ka Seiñraij Jowai nadooh na Madan Datlawakor (Stand War), Madan Siat-thong, Madan Chaad Sukra (haphrang ka yaw Chor), Madan Kñia Khat (Stand Shangpung) wa ka Madan Moosaphir (haphrang Jowai Police Station).
Da ong u leh wa yeini da leh neibynta i bha i miat ki paidbah khamtam kam heini i por wa ka khlam COVID-19 dang poor bha ko deiwa kyntu leh ya kiwa chong dai wow man ki kiwa yaichah wa ka Seiñraij.
