Hadien wa pteiñ i ku kiwa chah ktah ha ka khlam kjut COVID-19 hapoh ka West Jaiñtia Hills District wei hadien wa da kubur u montri ka chnat i chait i khiah ka jylla, u AL Hek heiwa ympu em ka Corona Care Centre ha West Jaiñtia Hills wei yeini neiliang ki montri ka sorkar jylla wa ki MLA ka District da rai ki wow pynsñiaw ha ka sorkar jylla yei emkaam wow booh ya kani ka Centre ha ka District.
Ynne ka sngi hawa yaklam wa u Deputy Commissioner ka District, u Garod LSN Dykes da kubur u wa ym em de booh ya ka Corona Care Centre wa ki Institutional Quarantine namo ki thaw pynchong-kset ka sorkar hapoh ka District wei da pyndam ya ki nadooh ka 1 Duyatra (January) uni u snem.
U DC da pyntip u wa hadien ka yalang wa ki MLA na ka District ha ka 6 tarik, wei ha ka 7 tarik da wan sa u montri ka chnat i chait i khiah, u AL Hek da khana yeiwa emkaam wei neiliang ka chnat da pynkrehkaam biang ko ya ka St. Aloysius Hospital, Ummulong wow man biang ko kam ka Corona Care Centre wei da pynbiang lut yeiwa emkaam wei nadooh ynnin ka 10 tarik da pynkreh ya ka.
“Hadooh katni dang phah ya kiaw chitom cha ka MCH, Jowai neibhah wa em ko 70 tylli ki pyllong wei lada emkaam chooh chooh daw ye u phah noh cha kani ka CCC,” da ong u Garod.
Heijooh i por da ong u wa hapoh ki CCC toh neibynta kiwa ym em chitom joor (Mild Symptoms) wei ya ki bru wakreh ha ki CCC neiliang u DMHO da leh u yeiwa emkaam hajrong ini deiwa thoh cha ka DHS wei ha kani ka Centre daw ye chwa ko wow pdiang hadooh 30 ngut ki bru.
